Njohësi i politikave Shenoll Muharremi ka dhënë një opsion që sipas do të ishte mënyrë e favorshme t’i përgjigjej lideri i LDK-së, Lumir Abdixhiku, atij të VV-së, Albin Kurtit pas lutjes së fundit të parë.
Ai specifikon disa detaje për të cilat Kurti insistonte, e që sipas Muharremit, Abdixhiku duhet t’i japë rrugë, transmeton klanosova.tv.
”Kështu ja kisha kthy letrën me qenë si kryesia e LDKsë:
Lidhja Demokratike e Kosovës
05/05/2025
Prishtinë
I nderuar deputet Kurti,
Ju faleminderit për letrën tuaj dhe për gatishmërinë që shprehni për të diskutuar një marrëveshje të mundshme politike ndërmjet LDK-së dhe LVV-së, në funksion të konstituimit të institucioneve të reja pas zgjedhjeve të fundit.
Siç e dini mirë, zgjedhjet që sapo i lamë pas ishin një dështim për ju dhe subjektin tuaj. Ju kërkuat 500 mijë vota, por nuk i keni fituar, keni humbur. Ajo që e quajtët “referendum” u përmbyll pa sukses. Qasja e juaj “o krejt, o asgjë” është ndëshkuar nga qytetarët, të cilët kanë vendosur për një ndryshim të qartë drejt maturisë politike, shtetndërtimit dhe stabilitetit institucional.
Sot nuk keni as votat dhe as mandatet e nevojshme për të udhëhequr vendin. Si në çdo herë tjetër kur mbeteni pa rrugëdalje, po kërkoni ndihmën e partisë më të madhe institucionale në vend, Lidhjes Demokratike të Kosovës.
A ju kujtohet gjuha polarizuese gjatë fushatës? A ju kujtohet si u sollët më 9 shkurt, kur pas humbjes fyerët të gjithë të tjerët duke i quajtur “hajvana”? Ky nuk është një sjellje që reflekton as përgjegjësi, as vetëdije për rolin e liderit në demokraci.
Megjithatë, për hir të qytetarëve të Republikës së Kosovës dhe jo për shkak të jush, e pranoj letrën tuaj dhe jam i gatshëm të shqyrtoj propozimin për bashkëqeverisje, nën këto kushte të panegociueshme:
- Qeveria e ardhshme duhet të udhëhiqet nga Lidhja Demokratike e Kosovës. Kjo nuk është objekt negocimi.
- Ju, z. Kurti, nuk duhet të jeni pjesë e qeverisë së ardhshme në asnjë kapacitet.
- Lëvizja Vetëvendosje mund të udhëheqë vetëm një ministri ku është dëshmuar sukses relativ gjatë mandatit të kaluar. Për shumicën absolute të dikastereve, ka pasur dështim të theksuar.
- Programi qeverisës i Lidhjes Demokratike të Kosovës do të jetë themeli i mandatit të ri. Ai është një program për zhvillim ekonomik, përkushtim ndaj demokracisë, respekt ndaj sektorit privat dhe forcim të institucioneve. Nuk do të ketë vend për qasje anti-biznes, retorikë përjashtuese apo eksperimente me shtetin.
Nëse jeni i gatshëm ta pranoni këtë realitet të ri politik dhe institucional, pres përgjigjen tuaj jo më larg se nesër, më 6 maj, në orën 14:00.
Me respekt,”
