Kirill Dmitriev, negociatori i lartë rus, pritet të vizitojë Uashingtonin këtë javë për të zhvilluar bisedime me Steve Witkoff, një zyrtar të lartë të administratës Trump, në lidhje me forcimin e marrëdhënieve ndërmjet dy vendeve, ndërkohë që ata kërkojnë të përfundojnë luftën në Ukrainë, sipas një zyrtari të SHBA-së dhe dy burimeve të njohura me planet.
Kjo vizitë do të shënojë herën e parë që një zyrtar i lartë rus viziton Uashingtonin që nga pushtimi i Ukrainës nga Rusia në vitin 2022 dhe do të përbëjë një hap tjetër në përmirësimin e marrëdhënieve midis dy vendeve që nga kthimi i Donald Trump në presidencë në janar.
Dmitriev është një këshilltar i afërt i presidentit rus, Vladimir Putin dhe udhëhoqi një delegacion rus në Riad të Arabisë Saudite në shkurt, për të filluar bisedimet për një zgjidhje të mundshme të luftës në Ukrainë. Ai gjithashtu ka bashkëpunuar me Witkoff për lirimin e mësuesit amerikan, Marc Fogel, nga Rusia, një veprim i cilësuar si një gjest miqësor nga administrata Trump.
Qeveria e SHBA-së ka hequr përkohësisht sanksionet ndaj Dmitriev për t’i mundësuar atij marrjen e një vize për të udhëtuar në SHBA, tha një nga burimet e njohura. Një tjetër burim shtoi se ishte kërkuar nga Departamenti i Thesarit një pezullim të përkohshëm të sanksioneve.
Një zëdhënës i Departamentit të Shtetit u shpreh për CNN se “të dhënat mbi vizat janë konfidenciale sipas ligjit të SHBA-së,” dhe se ata “nuk mund të komentojnë për raste të veçanta vize.”
CNN ka kontaktuar Shtëpinë e Bardhë, ndërsa një zëdhënës i Departamentit të Thesarit refuzoi të komentonte kërkesën e CNN-së.
Vizita e Dmitriev do të ndodhë disa ditë pasi Trump, në një intervistë për NBC, sugjeroi mundësinë e sanksioneve të tjera ndaj Rusisë dhe shprehu mllefin e tij ndaj presidentit rus Putin për kritikën ndaj presidentit ukrainas Volodymyr Zelensky.
Pavarësisht kritikave të Trump, presidenti ka ndryshuar qëndrim në krahasim me administratën e mëparshme të Joe Biden për sa i përket luftës në Ukrainë. Administrata e kaluar ka vënë sanksione të ashpra ndaj Moskës për pushtimin e vitit 2022 dhe ka ofruar ndihmë të konsiderueshme ushtarake për Kievin.
