Shefi i kabinetit të Presidentes së Kosovës, Blerim Vela, i cili njihet kryesisht për shkrime me platformën X, ka shlyer komentin e tij të turpshëm ku ndërlidhi gazetarin shqiptar Fahri Musliu me presidentin serb, Aleksandër Vuçiç.
E gjitha filloi kur opozita serbe filloi t’i thoshte Vuçiç-it se ai përngjan aq shumë në gazetarin Musliu dhe meqë për një kohë ai ka punuar në Beograd, Vuçiç është djali i një shqiptari.
Meqë është fushatë zgjedhore në Beograd, Vuçiç përdori këto sulme për t’u viktimizuar dhe doli me babanë e tij në një video ku thoshte se po sulmohet familja e tij dhe rrjedhimisht gjithë familjet serbe.
“Jam krenar me babin tim, është shumë më i mirë se unë dhe kam mësuar shumë prej tij. Ju them edhe njëherë babai im është Anxheliko, e dua pafundësisht dhe do ta shpëtojmë vendin nga ju”, thotë Vuçiç në video.
Kësaj videoje i reagoi – meqë s’ka punë tjetër – shefi i kabinetit të Vjosa Osmanit.
Vela, duke përfshirë këtu gazetarin Musliu shkroi se “kjo është e kotë”, meqë për ta vërtetuar se nuk je djali i gazetarit shqiptar “duhet ta bësh me poligraf dhe testin e ADN-së”.
Por, s’u ndal me kaq, duke thënë edhe se përveç Vuçiç-it, duhet ta bëjnë bashkë “ti dhe Fahriu”.
Vela ka marrë kritika të shumta në Kosovës, për mungesën e maturisë dhe degradimin e pozitës së tij shtetërore, duke ofenduar kështu vetë gazetarin veteran Musliu dhe familjen e tij.
Më vonë, pas kritikave, Vela e ka fshirë komentin dhe për një kohë është jashtë funksionit i gjithë profili i tij në X.
Për këtë komet, ka reaguar publicisti dhe gazetari, Halil Matoshi, i cili përmes një postimi në Facebook, i ka kërkuar Presidentes Vjosa Osmani, që ta shkarkojë Velën nga posti i shefit të kabinetit të saj.
“Me pasë Kosova Presidente normale, për 15 minuta është dashtë me e shkarku Blerim Velën, por shteti po identifikohet me vulgus-in dhe vulgaren si diskurs”, shkroi Matoshi.
Ndërsa, shkrimtari Matoshi, nuk kursej lëvdatat për gazetarin Musliu, të cilin tha se e njeh që 40 vite.
“Gazetar e publicist me integritet i brezit të ‘Rilindjës’. Ai ka një familje e prestigj shoqëror, por nuk ka një instancë në shtet që e mbron nga përgojimet idiote të pushtetit”, shtoi.
“Nëse pushtetit i lejohet me denigru qytetarin Musliu dhe familjen e tij, mua më lejohet me konstatu se këshilltari i Presidentes është një fundërrinë”.
