Ministri i Brendshëm i Iranit ka thënë se neglizhenca ishte një faktor në shpërthimin masiv dhe zjarrin në portin më të madh të kontejnerëve në vend, ndërsa numri i të vdekurve u rrit në të paktën 70.
Eskandar Momeni tha se shpërthimi i së shtunës në portin Shahid Rajaee në Bandar Abbas, i cili plagosi gjithashtu më shumë se 1,000 persona, u shkaktua nga “mangësitë, duke përfshirë mosrespektimin e masave paraprake të sigurisë dhe neglizhencën”.
“Disa individë të konsideruar përgjegjës” ishin thirrur për t’u marrë në pyetje, shtoi ai, shkruan euronews.
Autoritetet doganore kanë thënë se ngarkesa e importuar u përfshi nga flakët dhe shpërtheu. Ministria e mbrojtjes ka mohuar raportet e huaja se bëhej fjalë për një dërgesë të një kimikati për karburant raketash.
Drejtori i menaxhimit të krizave për provincën Hormozgan, Mehrdad Hassanzadeh, tha gjithashtu të hënën se përpjekja për shuarjen e zjarreve në port ishte “pothuajse në fazat e saj të fundit”.
Ndërkohë, guvernatori i Hormozganit, Mohammad Ashuri Taziani, tha se operacionet e pastrimit në port mund të vazhdojnë për disa ditë të tjera dhe se mund të duhen një deri në dy javë para se situata atje të kthehet në normalitet.
Ai vlerësoi se 1.500 hektarë pothuajse dy të tretat e vendit, u prekën rëndë nga shpërthimi.
