Ministri i Punëve të Brendshme, Xhelal Sveçla, ka thënë se zvarritja e zbardhjes së “vrasjes” së aktivistit të LVV-së, Astrit Deharit, rëndon dhimbjen e përbashkët.
Ai në një postim në Facebook, ka thënë se drejtësia dhe llogaridhënia për vrasjen e tij janë të pashmangshme.
“Sot bëhen 7 vite pa shokun e bashkëaktivistin tonë Astrit Dehari. Mungesa e tij në mesin tonë është e madhe, teksa zvarritja e zbardhjes së vrasjes së tij rëndon dhimbjen tonë të përbashkët. Drejtësia dhe llogaridhënia për vrasjen e tij janë të pashmangshme. Astriti, ky aktivist i shquar i dijes dhe i punës, na mungon çdo ditë e më shumë ndërsa idealet e tij janë dhe do të jenë gjithmonë udhërrëfyesi në angazhimet tona të përditshme. Drejtësi për Astritin”, shkroi Sveçla.
Shtatë vjet më parë, Kosova u trondit me një vdekje e cila ende sot vazhdon të jetë një mister.
Ky është misteri i vdekjes së aktivistit të Lëvizjes Vetëvendosje, Astrit Dehari, i cili vdiq në qelinë e paraburgimit në Prizren më 5 nëntor 2016.
Për të shënuar këtë ditë, VV-ja ka organizuar disa aktivitete.
