Raportuesi për Kosovën në Parlamentin Evropian, Riho Terras, ka ngritur shqetësimin për ndikimin e dezinformatave nga Rusia dhe Kina në Ballkanin Perëndimor, me synimin për të penguar integrimin e rajonit në Bashkimin Evropian.
Përmes një postimi në platformën X, Terras ka theksuar se në raportin e tij të fundit për Kosovën i ka kushtuar vëmendje të veçantë çështjeve të sigurisë dhe kërcënimeve hibride, transmeton Klankosova.tv.
“Në raportin tim për Kosovën, i kushtoj vëmendje të veçantë sigurisë. Dezinformimi nga Rusia dhe Kina ka për synim të destabilizojnë rajonin dhe të pengojnë rrugën e Ballkanit Perëndimor drejt BE-së”, ka shkruar ai.
Eurodeputeti estonez ka theksuar gjithashtu se Parlamenti Evropian i bën thirrje Kosovës të reagojë më fuqishëm ndaj këtyre kërcënimeve të jashtme, duke rritur qëndrueshmërinë institucionale dhe bashkëpunimin me partnerët perëndimorë në fushën e sigurisë dhe luftës kundër dezinformimit.
