Presidenti ukrainas, Volodymyr Zelensky, ka deklaruar se të paktën 155 shtetas të Kinës janë duke luftuar në anën e Rusisë në luftën në Ukrainë, duke ngritur shqetësime për përfshirjen e shtetasve të huaj në konflikt.
Komentet e tij erdhën pas kapjes së dy luftëtarëve kinezë në fillim të kësaj jave, çka përbën herën e parë që Kievi ngre një akuzë zyrtare ndaj Kinës për dërgimin e personelit që lufton përkrah forcave ruse.
Duke folur për gazetarët të mërkurën, Zelensky u shpreh se numri i vërtetë i qytetarëve kinezë të përfshirë mund të jetë edhe më i lartë.
“Ka shumë më shumë,” tha ai, duke u bazuar në informacionet e mbledhura nga autoritetet ukrainase.
Nga ana tjetër, Kina ka mohuar më herët përfshirjen e shtetasve të saj në konflikt, duke e quajtur pretendimin “të pabazuar në fakte”. Pekini ende nuk ka dhënë një përgjigje zyrtare për shifrën e përmendur nga Zelensky.
Të mërkurën, zëdhënësi i Ministrisë së Jashtme të Kinës, Lin Jian, deklaroi se autoritetet kineze janë “duke verifikuar situatën përkatëse me Ukrainën”, ndërsa sugjeroi se çdo përfshirje mund të jetë në kapacitet privat.
“Më lejoni të theksoj se qeveria kineze u kërkon gjithmonë shtetasve kinezë të qëndrojnë larg zonave të konfliktit të armatosur, të shmangin çdo formë të përfshirjes në konflikt të armatosur dhe në veçanti të shmangin pjesëmarrjen në operacionet ushtarake të ndonjë pale,” u shpreh Lin.
Ai gjithashtu i bëri thirrje Ukrainës që të njohë përpjekjet e Kinës për zgjidhje paqësore.
“I kërkojmë Ukrainës që të shohë drejt përpjekjet dhe rolin konstruktiv të Kinës për zgjidhjen politike të krizës në Ukrainë,” theksoi zëdhënësi kinez.
