Kur një ekip ndërkombëtar shkencëtarësh botoi kërkime alarmante që tregonin se numri i spermatozoidëve ishte përgjysmuar në mbarë botën në 50 vitet e fundit dhe se trendi po përshpejtohej, natyrisht kjo ngjalli shqetësim
Rënia, paralajmëruan profesorët Hagai Levine dhe Shanna Swan, mund të bëhet një problem shumë i madh për t’u injoruar, me potencialin për të “kërcënuar mbijetesën e njerëzimit”.
Numri i spermatozoideve është i rëndësishëm, por nuk është gjithçka. Kur një mashkull shkon për një kontroll të fertilitetit dhe bën një analizë të spermës, shikohen tre parametra kyç: numri i spermatozoideve, por edhe lëvizshmëria dhe morfologjia e spermës.
Një numër anormalisht i ulët i spermës, i quajtur gjithashtu oligospermia, është kur një mashkull ka më pak se 15 milionë spermatozoide për 1 mililitër spermë.
Ekspertët riprodhues gjithashtu theksojnë se numri i spermës është një tregues i dobishëm i shëndetit të përgjithshëm. Burrat me numër të ulët të spermës priren të jetojnë më pak dhe kanë më shumë gjasa të kenë kancer, diabet dhe sëmundje kardiovaskulare sesa burrat më pjellorë.
“Për mendimin tim, nuk ka absolutisht asnjë dyshim që shëndeti riprodhues mashkullor ka ndryshuar për keq gjatë 70+ viteve të fundit dhe është një shqetësim i vërtetë për sa i përket ndikimit negativ në potencialin e fertilitetit në çift,” tha për Euronews Profesor Richard Sharpe nga Qendra për Shëndetin Riprodhues të Universitetit të Edinburgut.
Disa nga shkaqet kryesore në uljen e numrit të spermatozoideve janë: ekspozimi ndaj kimikateve, obeziteti, stresi, jeta sedentare, përdorimi i alkoolit dhe drogës.
Pjesa më e madhe e ushqimit që hamë dhe e produkteve të përditshme që përdorim janë të paketuara në plastikë – nga kozmetika dhe produktet tona të pastrimit deri te kokoshkat tona në mikrovalë. Kimikatet nga këto plastika rrjedhin në ushqimin tonë, mjedisin tonë dhe trupin tonë.
Çfarë mund të bëjnë burrat për të mbrojtur fertilitetin?
“Mund të tingëllojë e mërzitshme dhe e çuditshme, por ngrënia e një diete të ekuilibruar me shumë perime dhe fruta të freskëta dhe sasi të ulëta ushqimesh të përpunuara, është gjëja më e mirë që njerëzit mund të bëjnë,” tha Sharpe.
Ai thekson rëndësinë e aktivitetit fizik, mbajtjen e një peshe të shëndetshme dhe mospirjen e duhanit. Pirja e duhanit është e lidhur fort me infertilitetin. /Telegrafi/
Shpërndaje në
SONDAZH
Loading ...
