Posedimi i armëve është shndërruar në një dukuri negative, që përpos e kundërligjshme, po cenon dhe sigurinë publike. Policia vazhdimisht gjatë kontrolleve has në të dyshuar që posedojnë armë ilegale dhe sillen lirshëm me to. Një rast i tillë është zbuluar dje në rrugën “Afrim Stajki” në Prizren, ku si rezultat i një operacioni të realizuar nga Policia, një person përfundoi në pranga.
Burimet e Kosovalive kanë bërë me dje se operacioni është zhvilluar nga njësitë speciale të Policisë, ku pas bastisjes në shtëpinë e një të dyshuari u gjetën dhe u sekuestruan: një granatë dore F1, një pistoletë me gas BLOW F92 dhe një karikator me 9 fishekë.
Kosovalive mëson ekskluzivisht se i dyshuari në lidhje me këtë rast është Samedin Kastrati (rreth 65-vjeçar), i cili është arrestuar nga Policia.
Pas intervistimit, me vendim të Prokurorit i dyshuari është dërguar në mbajtje 48-orë.
Policia dhe organet e drejtësisë po vazhdojnë hetimet për të përcaktuar nëse ky rast lidhet me aktivitete të tjera kriminale.
Gazeta Kosovalive do të iu mbajë të informuar për vazhdimësinë e këtij rasti.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
