Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, që po shkaktojnë ankth e pasiguri, sidomos kur shtëpitë mbesin pa përkujdesje. Kështu ka ndodhur edhe në fshatin Bubavec të Malishevës, ku cak i hajnave është bërë një shtëpi, e cila ishte lënë pa përkujdesje.
Rasti është raportuar në Polici dje, nga pronari i shtëpisë, i cili ka deklaruar se nuk ka qenë në shtëpi që nga muaji shkurt, pasi jeton në Gjermani.
Me të marrë lajmin, njësitet policore kanë dalë në vendin e ngjarjes, ku është bërë shikimi dhe fotografimi i vendit të ngjarjes.
Burimet e Kosovalive bëjnë me dije se në vendngjarje vërehet se persona të dyshuar kanë depërtuar me forcë shtëpinë e ankuesit, ku kanë demoluar shtëpinë si dhe kanë kryer vjedhjen.
Pronari i shtëpisë ka deklaruar në Polici se hajnat i kanë vjedhur dy armë, të cilat i posedonte me leje. Sipas tij, të dyshuarit i kanë vjedhur edhe lejet e armëve.
Në lidhje me rastin është njoftuar edhe Prokurori, ndërsa hetimet për zbardhjen e rrethanave dhe kapjen e të dyshuarve janë duke vazhduar.
