Në Gjykatën Themelore në Prishtinë dega në Lipjan është mbajtur seanca fillestare ndaj pesë policëve të dyshuar për “Vrasje në Pakujdesi”, në rastin e 27 vjeçarit, Agon Zejnullahu. Mirëpo, avokati i familjes Zejnullahu, Asdren Hoxha, para gazetarëve ka treguar se gjyqtarja nuk e ka lejuar të marrë pjesë në seancën fillestare.
Ky vendim e ka çuditur avokatin Hoxha, duke treguar se kishte kërkuar sqarime disa herë “mirëpo qasja ishte e tillë që unë nuk duhej të merrja pjesë”.
Avokati i familjes së dëmtuar konsideron se ka qenë e arsyeshme pjesëmarrja e tij duke u thirrur në Kodin e Procedurës Penale të Kosovës, në nenin 63 parasheh të drejtën e të dëmtuarit dhe në nenin 64 të drejtën për të mbetur i informuar.
Avokati, Xhevdet Smakiqi, në një prononcim për Periskopin ka treguar në detaje se në këtë rast janë shkelur nenet e Kodit të Procedurës Penale nga ana e Gjyqtares të Procedurës Penale.
“Konsideroj që refuzimi i pjesëmarrjes së autorizuar të palës së dëmtuar në këtë rast përfaqësuesit të viktimës në rastin e Lipjanit nga ana e Gjyqtarit të Procedurës Paraprake bie ndesh me nenin 23, neni 24 dhe neni 2010 të Kodit të Procedurës Penale dhe me parimin e barazisë së palëve në procedurë e që është edhe pala e dëmtuar”, ka thënë ai.
Smakiqi e konsideron se në këtë fazë nuk ka të bëjë hetimi me masat e fshehta hetimore.
