Kompania Trainkos, ka reaguar pas aksidentit me fatalitet që ndodhi dje në Jagodë të Klinës, ku një person vdiq e tre të tjerë u lënduan, pasi një veturë u godit nga treni.
Përmes një komunikate, kjo kompani bëri të ditur se sipas raportit fillestar aksidenti ka ndodhur për shkak të mosrespektimit të shenjave të komunikacionit nga drejtuesi i veturës.
“Komunikacioni hekurudhor rregullohet me ligje dhe sinjalizime specifike, të cilat obligohemi t’i respektojmë në përpikëri. Rregullat dhe sinjalizimi i trafikut rrugor janë obligative për të gjithë përdoruesit e rrugës, përfshirë drejtuesit e mjeteve rrugore,” thuhet në njoftim transmeton Klankosova.tv.
Trainkos, apelon për kujdes maksimal dhe për respektim të rregullave të komunikacionit rrugor, me qëllim që të parandalohet përsëritja e rasteve të tilla tragjike.
Ndër të tjera, në komunikatë, shprehet keqardhje e thellë për humbjen e jetës, duke i shprehur ngushëllime familjes së viktimës.
