Varësia nga droga sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues e shpërndarës të substancave narkotike. Një rast i tillë është zbuluar dje në Podujevë, pas një aksioni të zhvilluar nga Policia, ku si rezultat është sekuestruar substanca narkotike e llojit marihuanë.
Burimet e Kosovalive bëjnë me dije se operacioni është zhvilluar në një shtëpi në rrugën “Ahmet Popova”, pas një informacioni operativ që çoi në dyshime për posedim të substancave narkotike.
Me autorizim të Prokurorisë, Policia ka kryer bastisje në shtëpinë e një të riu të dyshuar për përfshirje në aktivitet me narkotikë.
Kosovalive mëson eksluzivisht se i riu në shtëpinë e të cilit është kryer bastisja është Blend Murati.
Gjatë kontrollit në njërën nga objektet përcjellëse, janë gjetur dhe sekuestruar 12 gramë marihuanë, një peshore digjitale, 22 qese plastike të vogla dhe një pako rizlla – që përdoren për paketimin dhe konsumimin e substancave narkotike.
I dyshuari nuk është gjetur në shtëpi në momentin kur është kryer aksioni, por ndaj tij është lënë ftesë për paraqitje në stacionin policor.
Rasti është iniciuar si “Posedim i paautorizuar i narkotikëve, substancave psikotrope apo analoge”, ndërsa hetimet janë duke vazhduar.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
