Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhunë psikike e fizike nga bashkëshortët e tyre dhe anëtarët tjerë të familjes.
Një rast i tillë ka ndodhur së fundmi në një familje në Pejë, ku një person dyshohet se ka ushtruar dhunë fizike dhe psikike ndaj bashkëshortes së tij.
Siç mëson Kosovalive, i dyshuari kishte ushtruar edhe më herët dhunë ndaj viktimës, deri sa ajo mori forcën për ta raportuar atë në polici.
Viktima është intervistuar në prani të psikologes, ndërsa ka refuzuar të marrë trajtim mjekësor. Ajo ka zgjedhur që përkohësisht të strehohet tek shtëpia e prindërve të saj.
I dyshuari në lidhje me rastin është akoma në arrati.
Në lidhje me këtë ngjarje është informuar edhe Prokurori, me urdhër të të cilit rasti është inicuar si ‘Dhunë në familje’.
