Një incident i rëndë ka ndodhur mbrëmjen e së enjtes në Mitrovicë, ku dy të rinj janë sulmuar fizikisht nga persona të panjohur, ndërsa njëri prej të dyshuarve ka shtënë me armë zjarri. Rasti ka ndodhur rreth orës 20:53, në rrugën “Adem Voca”.
Burimet e Kosovalive kanë bërë me dije se viktimat kanë raportuar në Polici se disa persona të maskuar kanë dalë nga dy vetura dhe i kanë ndjekur.
Sipas dëshmitarëve të rastit, të dyshuarit i kanë ndjekur viktimat deri në një shitoren e tyre, ku i kanë sulmuar fizikisht, duke u shkaktuar lëndime në fytyrë.
Pasi kanë dalë nga shitorja, të dyshuarit kanë thyer xhamat e saj dhe më pas, njëri prej tyre ka shtënë me armë zjarri në drejtim të panjohur.
Njësitet policore kanë dalë në vendin e ngjarjes dhe kanë gjetur pesë gëzhoja dhe një predhë, të cilat janë sekuestruar si prova materiale.
Nga analizimi i disa pamjeve të siguruara nga kamerat e sigurisë së shitores, janë identifikuar tre persona të dyshuar, ku njëri prej tyre shihet duke mbajtur armën në dorë.
Me urdhër të gjyqtarit të procedurës paraprake, është kryer një bastisje në rrugën “Evlia Qelebia”, në një shtëpi të dyshuarve, por ata nuk janë gjetur në vendbanim.
Rasti është iniciuar si “Përdorim i armës apo mjetit të rrezikshëm” dhe “Mbajtja në pronësi, kontroll ose posedim të paautorizuar i armës”.
