Mosmarrëveshjet mes të rinjve shpesh herë eskalojnë në kërcënime serioze, pasi nuk arrijnë të zgjidhen me dialog. Një rast i tillë ka ndodhur dje në rrugën “Dëshmorët e Kombit” në Ferizaj, ku një 16-vjeçar ka kanosur një person dhe më pas është kapur me një thikë.
Burimet e Kosovalive kanë bërë me dije se i dyshuari (16-vjeçar) është takuar rastësisht me viktimën (20-vjeçar), dhe për shkak të një mosmarrëveshjeje të mëhershme, i dyshuari i është afruar viktimës duke e kërcënuar me fjalët “kam me të vra”.
Në atë moment, dy policë civilë që ndodheshin aty kanë ndërhyrë dhe kanë vënë situatën nën kontroll.
Gjatë ndërhyrjes, të dyshuarit i ka rënë në tokë thika që e kishte me vete.
Pas kësaj, njësiti patrullues ka shoqëruar të dyshuarin në stacionin policor, ndërsa arma e ftohtë është sekuestruar si provë materiale.
Me vendim të prokurorit, pas intervistimit, i dyshuari është liruar në procedurë të rregullt.
Ndërkaq, rasti është iniciuar për veprat penale “Mbajtja në pronësi, kontroll ose posedim të paautorizuar të armëve” dhe “Kanosja”.
Hetimet në lidhje me këtë ngjarje janë duke vazhduar.
