Mbrëmë, në hyrje të banesës së tij në Kaçanik, mbeti i vrarë rreshteti Muhamed Lika.
Lidhur me këtë ka reaguar kryeparlamentari në detyrë, Glauk Konjufca, transmeton Klankosova.tv.
Ai ka bërë thirrje për hetime sa më të plota e të shpejta që është e mundur.
“Shumë i pikëlluar për vrasjen e rreshterit policor Muhamed Lika në Kaçanik. Kjo është një ngjarje e rëndë dhe tejet pikëlluese, ku u qëllua për vdekje një zyrtar policor i Kosovës, i cili deri dje ishte në shërbim të mbrojtjes së rendit dhe sigurisë së qytetarëve. Bëj thirrje për hetime sa më të plota e të shpejta që është e mundur, në mënyrë që autori apo autorët e këtij krimi të vendosen përballë drejtësisë”, ka shkruar Konjufca në Facebook.
“Ngushëllimet më të sinqerta për familjen, miqtë dhe kolegët e rreshterit Muhamed Lika, të cilët duhet të gjejnë forcën për ta përballuar këtë humbje të madhe!”.
Sakaq, dorasi, sipas policisë është ende në arrati.
