Albert Krasniqi nga Demokracia Plus ka reaguar pas caktimit të seancës për konstituimin e Kuvendit të Kosovës e cila pritet të mbahet me 15 prill.
Krasniqi përmes një postimi në rrjetin social Facebook ka thënë se Gjykata Kushtetuese ka interpretuar se e drejta për të propozuar Kryetarin e Kuvendit i takon subjektit politik me numrin më të madh të deputetëve pas zgjedhjeve.
“Megjithatë, ajo nuk ka përcaktuar nëse kjo e drejtë mbetet e vlefshme edhe në rast se subjekti nuk paraqet një kandidat. Kujtojmë se në vitin 2014, PDK kishte propozuar Agim Aliun si kandidat për Kryetar të Kuvendit. Bllokimi i institucioneve nuk është i lejuar nga Kushtetuta, ashtu siç nuk ishte lejuar monopoli në rastin e propozimit të mandatarit për Kryeministër”, ka shkruar ai, raporton Periskopi.
Krasniqi ka treguar në detaje edhe për interpretimin nga Gjykata Kushtetuese.
“Një e drejtë që nuk ushtrohet, humbet. Prandaj, një interpretim nga Gjykata Kushtetuese për situatën kur nuk propozohet kandidat brenda një afati të arsyeshëm nuk duhet të shmanget mundësia që t’i takoj një subjekti tjetër politik që ka numrin për t’i dhënë Kryetar Kuvendit”, tha ai.
