Mbrëmjen e së mërkurës (23 prill), në lagjen Emshir të Prishtinës, një person mbeti i plagosur nga të shtënat me armë zjarri.
Lidhur me rastin, policia ka identifikuar një person të dyshuar.
Këtë për Klankosova.tv, e bëri të ditur zëdhënësi i policisë për rajonin e Prishtinës, Agron Borovci.
“Rreth orës 21:00 është raportuar për të shtëna me armë zjarri në rrugën ”Rexhep Krasniqi” në Prishtinë. Nga informacionet e para bëhet e ditur për një person të plagosur, jashtë rrezikut për jetë, i cili po merr trajtimin e nevojshëm mjekësor në QKUK. Policia menjëherë ka dalë në vendin e ngjarjes, ka identifikuar një person të dyshuar, si i implikuar në rastin në fjalë, përderisa po vijon punën hetimore me qëllim zbardhjen e plotë të rrethanave të kësaj ngjarjeje”, tha Borovci.
Sakaq, personi i dyshuar për plagosjen me armë zjarri është identifikuar si Valton Sadiku.
Burime kanë konfirmuar për Klankosova.tv, se Sadiku është emër i njohur për policinë dhe nuk është hera e parë që përfshihet në raste të rënda kriminale.
Sipas të dhënave të deritanishme, ndaj Sadikut janë të hapura disa raste penale, përfshirë incidente me armë zjarri.
Ai dyshohet gjithashtu për një tentim vrasjeje në një rast të mëparshëm, ndërsa për organet e rendit konsiderohet si person me rrezikshmëri të lartë dhe me prirje të përsëritura kriminale.
Tutje, Klankosova.tv ka mësuar se i plagosuri i përket moshës rreth 25-vjeçare, ndërsa i dyshuari sipas policisë gjendet ende në arrati.
I riu i plagosur është jashtë rrezikut për jetën dhe po trajtohet në QKUK.
Vërejtje: Personat e përmendur në këtë artikull, sipas ligjeve të Republikës së Kosovës, konsiderohen të pafajshëm deri në vendimin e formës së prerë nga gjykata.
