Kryetari i Nismës Socialdemokrate, Fatmir Limaj ka thënë se se s’ka pranuar asnjë shkresë nga kryetari i AAK-së, Ramush Haradinaj si “shqetësim për pozicionimin e hershëm, të parakohshëm e të befasishëm” të tij.
Para gazetarëve, Limaj tha se s’ka as dakordim, e as marrëveshje me ndonjë parti, por u shpreh i gatshëm për të biseduar me ata që i ofrohen.
Ai shtoi se është i gatshëm të ulet dhe të bisedojë edhe me opozitën.
“Nuk e di çka ka ndodhur. Unë s’kam pranuar asnjë shkresë nga askush dhe nuk kam parë ndonjë takim, ndonjë dakordim ndokund që dikush mos me u taku. Nëse keni pa ndonjë marrëveshje, e kam munguar unë. Unë s’di që ka pasur ndonjë takim. S’kemi asnjë marrëveshje politike me askënd. Kushdo që ofrohet jemi të gatshëm me u ulë edhe me bisedu”, tha Limaj para gazetarëve.
“NISMA s’ka marrëveshje me askënd deri më sot. NISMA është e gatshme që Kosova t’i formojë institucionet. Se çka do të ndodhin do të shohim nesër”, tha ai.
Haradinaj mëngjesin e së hënës tha se do të ishte sjellje e turpshme nga Limaj nëse do të mbështeste pushtetin për të krijuar qeverinë.
Ai madje tha se shqetësimin e tij ia kishte shprehur Limajt edhe përmes një shkrese, por që kryetari i NISMA-s e mohoi një gjë të tillë.
“I kam bërë një shkresë ku i kam shprehur shqetësimin për pozicionimin e hershëm, të parakohshëm e të befasishëm që e ka vështirësu pastaj krijimin e shumicës nga opozita. Është ndarje e turpshme nga ana e tij, pasi kemi shkuar në gjithë Kosovën, kemi kërkuar votë për ndryshim”, shtoi tutje Haradinaj.
