Oda Ekonomike e Kosovës i është drejtuar institucionit të Avokatit të Popullit, duke i kërkuar që të iniciojë lëndë në Gjykatën Kushtetuese për të pezulluar për një vit vendimin për kalimin e bizneseve në tregun e hapur të energjisë.
Zyra e Rregullatorit për Energji (ZRRE) ka kërkuar që të gjitha kompanitë me mbi 50 punëtorë ose me qarkullim mbi 10 milionë euro, të dalin në tregun e hapur të energjisë nga 1 qershori.
Oda Ekonomike i kërkoi Avokatit të Popullit që ta dërgojë këtë lëndë në Kushtetuese, pasi argumentoi se një kalim i tillë në treg të hapur do të ketë ndikim të drejtpërdrejt në koston e prodhimit apo shërbimit.
“Një rritje e tillë do të ndikonte negativisht në konkurrueshmërinë e bizneseve në tregun e brendshëm dhe atë të jashtëm, duke ulur gjithashtu standardin jetësor të qytetarëve”, tha OEK-u.
Në kërkesën drejtuar Avokatit të Popullit, OEK renditi arsyet e kërkesës për një pezullim njëvjeçar. Kjo odë tha se bizneset argumentojnë se dalja nga tregu i rregulluar mund të sjellë rritje të ndjeshme të kostove të energjisë, duke ndikuar drejtpërdrejt në qëndrueshmërinë financiare.
“Shumë kompani nuk janë të përgatitura për këtë kalim dhe kanë nevojë për më shumë kohë për t’u përshtatur me modelin e tregut të lirë”, tha OEK-u, duke shtuar se një kalim i menjëhershëm në një treg të liberalizuar të energjisë do të bënte që bizneset më të vogla të penalizoheshin më shumë, duke “ndikuar negativisht në konkurrencë”.
Po ashtu, OEK-u kërkon që me këtë vendim të mos caktohet një numër i përcaktuar i punonjësve apo një prag mbi vlerën e qarkullimit si kritere për daljen në tregun eghapur.
“Duke marrë parasysh këto shqetësime, bizneset i bëjnë thirrje ZRRE-së që të shqyrtojë mundësinë e shtyrjes së afatit për kalimin në tregun e hapur të energjisë për të paktën një vit. Një periudhë tranzicioni më e gjatë do t’u lejonte kompanive të përshtatin strategjitë e tyre dhe të shmangin goditjet e papritura financiare”, tha OEK-u në kërkesën drejtuar Avokatit të Popullit, raporton REL.
Si pjesë e Ligjit për energjinë elektrike, vendimi i ZRRE-së nënkupton që bizneset duhet ta zgjedhin vetë furnizuesin e tyre me energji elektrike.
Sipas ZRRE-së, konsumatorët që dalin në tregun e liberalizuar të energjisë, mund të furnizohen nga çdo kompani vendore që posedon licencë ose nga kompani të huaja.
Operatori për Furnizim me Energji (KESCO) është furnizuesi kryesor i licencuar për energji elektrike në Kosovë. Çmimet e produkteve të KESCO-s e përcakton ZRRE-ja.
Por, ZRRE-ja ka thënë se në vend janë të licencuar edhe 18 kompani të tjera që ofrojnë këtë shërbim.
Më 5 mars, përmes një njoftimi, KESCO tha se bazuar në kërkesën e ZRRE-së, kompanitë që kanë mbi 50 punëtorë apo qarkullim mbi 10 milionë euro, do të duhet të zgjedhin furnizuesin me rrymë brenda 15 ditësh, pasi, nga data 1 qershor, nuk do të jenë më në listën e konsumatorëve me tarifa të rregulluara.
Ato do të kalojnë në furnizim me çmime të parregulluara, të cilat përcaktohen nga kërkesa dhe oferta në treg.
