Presidentja e vendit, Vjosa Osmani ka dhënë detaje mbi temat e diskutimit me Sekretarin e Jashtëm të Mbretërisë së Bashkuar, David Lammy përmes një konference për media.
Ajo tregoi se me Lammyn ka biseduar për dialogun Kosovë-Serbi, duke theksuar se vendi ynë mbetet palë konstruktive e përkushtuar për paqe dhe stabilitet, pavarësisht provokimeve nga shteti serb.
“Kam përsëritur se Kosova mbetet palë konstruktive e përkushtuar për paqe dhe stabilitet, pavarësisht se vazhdimisht përballemi me provokime nga ana e Serbisë, përfshirë edhe sulmet e njëpasnjëshme që kanë filluar vite më herët e po vazhdojnë edhe tani. Dua ta përmend se është e domosdoshme që të ketë llogaridhënie dhe vënie të autorëve para përgjegjësisë por s’ka asnjë lëvizje në këtë drejtim nga ana e Serbisë, as sa i përket sulmit në Banjskë e as sulmit ndaj 93 ushtarëve të NATO-s që ndodhi më herët, por as veprimeve të fundit terroriste që kanë ndodhur në veri të vendit”, tha Osmani.
