Policia e Kosovës, konkretisht Departamenti i Policisë Kufitare ka njoftuar se e ka ndaluar një furgon me kozmetikë të kontrabanduar në vlerë mbi 13 mijë e 600 euro.
Sipas policisë, njësiti Anti-Kontrabandë e Doganës dhe Inspektorët e ATK-së kanë zbuluar se ngarkesa ishte deklaruar si lodra për fëmijë, por pas kontrolleve është zbuluar se ishte kozmetikë e kontrabanduar.
“Pas ndalimit nga Policia e Kosovës, dhe një kontrolli të detajuar në një automjet furgon Njësiti i Anti Kontrabandës së Doganës së Kosovës dhe Inspektorët e ATK-së, zbuluan se ngarkesa e deklaruar si lodra për fëmijë ishte kozmetikë e kontrabanduar, me vlerë prej 13.616 €. Hetimet po vazhdojnë në bashkëpunim me stacionin policor kompetent dhe ATK-në”, thuhet në njoftim.
Ndërsa, në një rast tjetër, policia kufitare në fshatin Novosellë ka ndaluar dy automjete ku janë sekuestruar 2 mijë e 475 kilogram manaferra të kontrabanduara, pa dokumente për prejardhjen.
“Është iniciuar rasti për ‘Kundërvajtje Doganore’, dhe malli i sekuestruar është dorëzuar për vlerësim dhe procedim nga Dogana e Kosovës”, thuhet në njoftim.
