Live

Ramadani: Serbia po bëhet një Rusi e Vogël

10:34 / 30 Korrik 2019

Nga Kosova Live

Zëvendësministri në detyrë i Mbrojtes, Burim Ramadani, ka thënë se armatosja e Serbisë e rrezikon paqen në Ballkan. Sipas tij Serbia po bëhet një Rusi e Vogël dhe kjo është shqetësim për gjithë rajonin.

“Orientimi dhe armatosja e Serbisë me pajisje ruse (edhe pse në këto lëvzije aferat korruptive janë enorme) ka për synim rrezikimin e gjithë Ballkanit, ndërsa paraqet hakmarrjen ruse e serbe ndaj NATO-s dhe demokracive të botës”, ka shkruar Ramadani në llogarinë e vet në “Facebook”.

Ai ka thënë se duhet të jetë e qartë se paqja e përhershme në Ballkan arrihet kur secili shtet i rajonit anëtarësohet në NATO dhe asnjë shtet në Ballkan nuk shërben si Rusi e Vogël.

“Prezenca dhe zgjerimi i NATO-s me Kroacinë, Shqipërinë, Malin e Zi dhe tashmë edhe me Maqedoninë e Veriut ka ndihmuar paqen dhe sigurinë rajonale. Unë besoj në politikën e zgjerimit të NATO-s, sipas Nenit të 10-të të Paktit Veri-Atlantik. Kështu, Kosova mund të jetë shteti i 31-të i NATO-s. Anëtarësimi i Kosovës në NATO do të kontribuojë fuqishëm në sigurinë rajonale”, ka shkruar Ramadani.

Presidenti i Serbisë, Aleksandar Vuçiq, dy ditë më parë në Nish mori pjesë në ceremoninë e pranimit të dhjetë automjeteve të blinduara nga Rusia. Ai me këtë rast u mburr dhe tha se deri në fund të vitit shteti rus do të dërgojë edhe armë të tjera në Serbi, të cilat tashmë janë blerë ose janë dhënë donacion.

Shpërndaje në

U Kopjua