Sekretari i Përgjithshëm i NATO-s, Mark Rutte, nuk ka dhënë ndonjë koment mbi marrëveshjen trepalëshe të mbrojtjes mes Kosovës, Shqipërisë dhe Kroacisë, si dhe atë mes Serbisë dhe Hungarisë.
Gjatë një konference për media në Bruksel, Rutte theksoi se stabiliteti në Ballkanin Perëndimor mbetet një çështje me rëndësi të madhe për NATO-n, duke rikujtuar praninë e Aleancës me trupat e KFOR-it në Kosovë dhe angazhimin në Bosnje e Hercegovinë.
Megjithatë, ai nënvizoi se marrëveshjet dypalëshe apo trepalëshe mbeten vendime të pavarura të shteteve përkatëse.
“Stabiliteti në Ballkanin Perëndimor është një shqetësim madhor për NATO-n. Për këtë arsye, ne jemi të pranishëm në Kosovë dhe Bosnje e Hercegovinë. Kemi pesë aleatë në rajon – Malin e Zi, Shqipërinë, Maqedoninë e Veriut, Kroacinë dhe Slloveninë – me të cilët po punojmë ngushtësisht. Por dua të theksoj se nuk më takon mua të komentoj çdo zhvillim në rajon. Këto janë vendime që u takojnë aleatëve individualë në lidhje me marrëveshjet bilaterale ose trepalëshe,” deklaroi Rutte.
Ai shtoi se edhe vende të tjera të NATO-s bashkëpunojnë në fusha të ndryshme të mbrojtjes, por theksoi se këto marrëveshje janë ekskluzivisht në kompetencën e shteteve dhe jashtë ndërhyrjes së Aleancës.
