10 ditë, pesë vrasje!
Këto janë zhvillimet që po mbizotërojnë kohëve të fundit në vendin tonë.
Më 23 mars, në Vushtrri u vra 19-vjeçari Ardit Zymeri. Bleon Dibrani, bashkëmoshatar i viktimës, u arrestua si i dyshuari kryesor për vrasjen.
Rreth orës 20:35 policia ka pranuar informatën për të shtëna me armë zjarri. Ngjarja ka ndodhur në rrugën “Galip Badivuku” në Vushtrri. Nga hetimet fillestare bëhet e ditur se si pasojë e plagëve të marra nga arma e zjarrit ka humbur jetën viktima mashkull kosovar rreth 19-vjeçar. Është arrestuar i dyshuari, është konfiskuar pistoleta me të cilën dyshohet se ka kryer veprën. Është bastisur edhe shtëpia e të dyshuarit, ku është gjetur dhe konfiskuar një armë e gjatë me pesë fishekë”, pati deklaruar për Klankosova.tv, zëdhënësi i policisë për rajonin e Mitrovicës, Avni Zahiti.
Vetëm një ditë më vonë, më 24 mars, në Stanoc të Vushtrrisë ndodhi një vrasje e dyfishtë.
Sipas policisë, dyshohet se Arsim Morina vrau fillimisht ish-punëtoren e tij, Nexhmedije Haradini, e më pas edhe vetën.
“Dyshohet se fillimisht burri e ka vrarë gruan pastaj vetën me armë zjarri. Në vendin e ngjarjes janë gjetur disa gëzhoja, tash pritet intervistimi i dëshmitarëve”, kishte thënë për Klankosova.tv, zëdhënësi i Prokurorisë së Mitrovicës, Valon Preteni.
Më 26 mars, edhe Prishtina u trondit nga një vrasje dhe plagosje.
I vrarë mbeti 62-vjeçari Naser Gashi, derisa i plagosur Miftar Miftari. Ende nuk dihen shkaqet e këtij akti.
Lajmin për vdekjen e tij ndërkaq e konfirmoi në një paraqitje për mediat mjeku kujdestar i Emergjencës, Agron Çitaku.
“Ka qenë pothuajse pa shenja jete dhe pas 30 minutash ka ndërruar jetë, ndërsa i plagosuri tjetër gjendjen e ka më mirë dhe pritet të marrë trajtime në ortopedi”, ka deklaruar ai.
Ndërsa dje, më 1 prill, mbeti i vrarë rreshteri Muhamed Lika, në hyrje të banesës së tij në Kaçanik.
“Më 01.04.2025, rreth orës 23:00, kemi pranuar një informacion se një person është plagosur dhe gjendet në gjendje të rëndë në hyrje të ndërtesës së tij, në rrugën “Idriz Seferi” në Kaçanik”.
“Viktima është një pjesëtar i Policisë së Kosovës Në vendngjarje, përveç njësive policore, ka dalë edhe ekipi i emergjencës së Kaçanikut, të cilët e kanë transportuar në Qendrën e Mjekësisë në Kaçanik”.
“Si pasojë e plagëve të marra pjesëtari i Policisë ka ndërruar jetë, kjo është konstatuar nga mjekët në këtë qendër”, tha zëdhënësi i policisë për rajonin e Ferizajt, Kanun Veseli për Klankosova.tv.
Dorasi ende nuk është gjetur, derisa policia vijon kërkimin e tij.
Lidhur me këto raste tragjike, kanë reaguar edhe krerët e shtetit, presidentja, e opozita.
Të alarmuar paraqiten edhe qytetarët e Kosovës.
