Meta, kompania mëmë e Facebook, ka thënë në një dosje se po rrit shpenzimet e saj për sigurinë personale të shefit ekzekutiv dhe bashkëthemeluesit, Mark Zuckerberg, me 4 milionë dollarë, në 14 milion dollarë, pasi që kompania ka shkurtuar mijëra vende pune, në atë që Zuckerberg e ka quajtur “viti i efikasitetit”.
Bordi i Metës deklaroi se rritja e sigurisë prej 40% ishte “e përshtatshme dhe e nevojshme në rrethanat” dhe ishte në vend “për të adresuar shqetësimet e sigurisë për shkak të kërcënimeve specifike ndaj sigurisë së tij që lindin drejtpërdrejt si rezultat i pozicionit të tij si themelues, kryetar dhe CEO i Metës”.
Zuckerberg lejohet të përdorë paratë për të paguar për “personel shtesë, pajisje, shërbime, përmirësime të banesave” dhe nevoja të tjera të lidhura me sigurinë. Kostot e tij personale të sigurisë u rishikuan për herë të fundit në vitin 2018 kur ai mori 10 milionë dollarë nga kompania.
Paga e manjatit të teknologjisë është vetëm 1 dollarë në vit – por të ardhurat e tij janë shumë më tepër. Zuckerberg renditet si personi i 16-të më i pasur në botë në listën e miliarderëve të Forbes për shkak të aksioneve të tij në Meta.
Meta pushoi nga puna 11,000 punonjës, e barabartë me 13% të fuqisë punëtore, shkruan Guardian.
Kur njoftoi shkarkimet në nëntor të vitit të kaluar, Zuckerberg tha se rënia e të ardhurave nga reklamat, rritja e konkurrencës dhe një rënie më e gjerë ekonomike nënkuptonin që kompania duhej të zvogëlohej.
Meta, dikur e vlerësuar në 1 trilion dollarë, humbi 70% të vlerës së saj në 2022. Në korrik, kompania raportoi rënien e saj të parë ndonjëherë të të ardhurave.
Shpërndaje në
SONDAZH
Loading ...
