Ministrja e Drejtësisë, Albulena Haxhiu ka akuzuar prokurorinë dhe prokurorin e rastit për neglizhencë të punës në mbrojtje të tashmë të ndjerës Hamide Magashi e cila u vra mizorisht nga ish bashkëshorti i saj në QKUK.
Haxhiu tha sot se prokurori i rastit ka treguar pakujdesi pasi që viktima kishte njoftuar organet e rendit për dhunë të vazhdueshme të ushtruar nga ish burri i saj.
“Pesë ditë dy jetë të humbura, dy gra të vrara nga bashkëshortët e tyre. Kemi diskutuar veprimet institucionale. Sipas informacioneve nga Policia viktima kishte raportuar në korrik të këtij viti të dyshuarin për dhunë fizike dhe psiqike dhe prokuroria e kishte liruara të dyshuarin në procedurë të rregullt. Është një pakujdesi ndaj prokurorit të rastit. Sikur prokuroria të ishte në krye të detyrës ndoshta vrasja ishte ndaluar”, tha Haxhiu
Me tutje ajo tha se kjo neglizhencë e prokurorisë po inkurajon vrasësit.
Pas çaste më parë edhe Gjykata Themelore në Ferizaj ka lëshuar një komunikatë për media, pasi të mërkurën në oborrin e QKUK-së, Sokol Halili dyshohet se ka privuar nga jeta tani të ndjerën gruan shtatzënë Hamide Magashi, 35-vjeç.
Gjykata tregoi se viktima ka pasur urdhër-mbrojtje në kohëzgjatje prej gjashtë muajsh, duke filluar nga 13 shtatori i këtij viti deri më 13 mars të 2023-s.
“Lidhur me këtë ju njoftojmë se në Gjykatën Themelore në Ferizaj, në bazë të dhënave nga Sistemi Informativ për Menaxhimin e Lëndëve SMIL, janë të evidentuar këto të dhëna. Me datë 08.09.2022, nga Zyra për Mbrojtje dhe Ndihmë e Viktimave në Ferizaj, është paraqitur kërkesë për lëshimin e urdhrit mbrojtës ndaj palës përgjegjëgjëse S.H. sipas nenit 13 dhe 14 të Ligjit për Mbrojtje nga dhuna në familje”, thuhet në njoftimin e Gjykatës.
Sipas po të njëjtit njoftim thuhet se Gjykata pas mbajtjes së seancës së shqyrtimit të kërkesës së urdhrit mbrojtës, me datë 13.09.2022 ka lëshuar aktvendimin për urdhër mbrojtje me të cilën ka aprovuar kërkesën për urdhër mbrojtje të palës së mbrojtur dhe palës përgjegjëse i ka shqiptuar masat mbrojtëse sipas nenit 5 dhe 6 të Ligjit për Mbrojtje nga dhuna në familje, në kohëzgjatje prej gjashtë muajve duke filluar nga data 13.09.2022 deri më datë 13.03.2023.
Sipas kumtesës, i dyshuari për vrasjen e ish-gruas së tij ishte shpallur fajtor për mbajtjen e paautorizuar të armëve dhe ishte dënuar vetëm me gjobë.
“Ky aktvendim i është dorëzuar palëve dhe atë palës përgjegjëse, mbrojtësit të tij, palës së mbrojtur, mbrojtësit të viktimave, QPS –Lipjan si dhe Stacioni Policor në Lipjan i cili është urdhëruar që ta bëjë zbatimin e vendimit të urdhrit mbrojtës. Me datë 23.09.2022, me aktgjykimin e evidentuar si: 2022:174052, i pandehuri S.H. është shpallur fajtor për veprën penale mbajtja në pronësi, kontroll ose posedim të paautorizuar të armëve nga neni 366 paragrafi 1 të KPRK-së dhe i është shqiptuar dënim me gjobë”, thuhet tutje.
“Me datë 10.08.2022, Prokuroria Themelore në Ferizaj – Departamenti i Përgjithshëm, ka
ngritur aktakuzën e evidentuar si: PP.II.nr,1066/2022, me të cilin ka akuzuar të pandehurin S.H. për veprën penale kanosja nga neni 181 paragrafi 4 lidhur me paragrafin 2 të KPRK-së, ndaj të dëmtuarës H.M. Me datë 07.09.2022 lidhur me këtë aktakuzë është caktuar dhe mbajtur shqyrtimi fillestar, me ç ‘rast i pandehuri S.H. ka deklaruar se nuk e pranon fajësinë për veprën penale për të cilën akuzohet. Gjykata në afatin prej 30 ditëve konform nenit 245, 249 dhe 250 të KPP-së, i ka njoftuar të pandehurin dhe mbrojtësin e tij se mund të paraqesin kërkesë për hudhje të aktakuzës dhe kundërshtimit të provave. Mbrojtësi i të pandehurit S.H. me datë 26.09.2022 ka paraqitur kërkesë për hudhjen e aktakuzës dhe kundërshtimit të provave. Gjykata me datë 18.11.2022, ka marr aktvendim dhe ka refuzuar kërkesën e mbrojtësi të pandehurit për hudhje të aktakuzës dhe kundërshtimit të provave”, përfundon komunikata e Gjykatës dërguar mediave.
Shpërndaje në
SONDAZH
Loading ...
