Trupat ruse kanë marrë kontrollin e plotë të qytetit lindor të Ukrainës, Vuhledar, një bastion që u kishte rezistuar sulmeve intensive ruse që nga fillimi i luftës së vitit 2022, citon agjencia e lajmeve Reuters.
Kanalet ruse në Telegram publikuan video të trupave duke valëvitur flamurin rus trengjyrësh mbi ndërtesat e shkatërruara.
Qyteti, i cili kishte një popullsi prej mbi 14,000 banorësh para luftës, është shkatërruar, me ndërtesa banimi të epokës sovjetike të shkatërruara dhe të plagosura. Të martën, një zyrtar rajonal ukrainas tha se trupat ruse kishin arritur në qendër të Vuhledar, një qytet i pasur me minerale dhe qymyrguri, shkruan A2.
“Në Vuhledar kanë mbetur vetëm 107 persona. Falë Zotit i kemi evakuuar të gjithë fëmijët. Nuk ka fëmijë atje për një kohë të gjatë, për sa i përket 107 personave që kanë mbetur aty, është e vështirë të arrihet dhe t’u japim ndihma humanitare, ujë të pijshëm, ilaçe sepse ata janë aktivë. Faza e luftës është duke u zhvilluar”, tha Vadym Filashkin, Guvernatori i Rajonit Donetsk.
“Situata në Vuhledar është shumë e vështirë, është më e vështira sepse sulmet kanë vazhduar për më shumë se gjashtë muaj dhe armiku vazhdimisht forcon radhët e tij me forca të freskëta dhe të stërvitura. Situata është shumë komplekse, por ne po mbajmë dhe po e përmbushim detyrat që na janë dhënë sa më mire. Raporti midis nesh dhe rusëve për sa i përket këmbësorisë dhe artilerisë është 1 me 10. Dronët, do të thosha 1 me 5, ose 1 me 6”, tha Andriy Nazarenko, Komandant i Batalionit të Dronëve Vulhedar, transmeton A2.
Ndërkohë bëhet e ditur se trupat ruse bombarduan Harkivin, qytetin e dytë më të madh të Ukrainës, duke shkaktuar dëme të konsiderueshme, bëri të ditur kryebashkiaku Ihor Terekhov përmes një postimi në Telegram. Në një sulm të ngjashëm në Derhaçi – një qytet i vogël rreth 15 kilometra në veri të Harkivit – u plagosën disa njerëz, përfshirë një fëmijë, tha guvernatori i Harkivit, Oleh Synyehubov. Rusia mohon se i shënjestron zonat civile, pavarësisht provave që dëshmojnë të kundërtën.
Shpërndaje në
SONDAZH
Loading ...
