Sllovakia po kërkon të arrijë një marrëveshje me partnerët evropianë në lidhje me furnizimet me gaz rus deri të martën, në mënyrë që të miratojë një paketë të re sanksionesh të BE-së ndaj Rusisë, njoftoi kryeministri Robert Fico.
Ai u tha gazetarëve në Bratislavë se dëshiron “ta zgjidhë këtë deri të martën, sepse tensionet po rriten nga të gjitha anët”.
Bëhet e ditur se deri më tani, Sllovakia ka mbajtur veton e saj në paketën e 18-të të sanksioneve që do të zbatohet në përgjigje të agresionit rus në Ukrainë.
Bratislava e ka bllokuar paketën për shkak të shqetësimeve mbi një heqje graduale të propozuar të të gjitha lëndëve djegëse fosile ruse deri në vitin 2028, nga frika se kjo mund të dëmtojë interesat ekonomike të vendit.
Sllovakia merr pjesën më të madhe të gazit të saj nga Rusia dhe ka një kontratë afatgjatë me Gazprom të Rusisë që vlen deri në vitin 2034.
Fico dëshiron garanci ligjore nëse Gazprom pretendon një shkelje të mundshme të kontratës, shkruan euronews.
“Ne duhet të fitojmë diçka në këtë betejë, megjithëse nuk do të jetë një rezultat 100-0”, tha Fico.
Ai vuri në dukje se kishte folur me kancelarin gjerman Friedrich Merz për këtë çështje, duke theksuar se Sllovakia do të hiqte veton e saj nëse arrihet një marrëveshje për ndalimin e gazit.
Ndryshe, paketa e fundit e sanksioneve, e zbuluar nga presidentja e Komisionit Evropian Ursula von der Leyen dhe përfaqësuesja e lartë Kaja Kallas, fut në listën e zezë edhe 22 banka ruse dhe zgjeron ndalimin e transaksioneve për subjektet me seli jashtë vendit që kontribuojnë në anashkalimin e sanksioneve.
