Çështja e shumëpërfolur e drejtorit të Agjencisë për Krahasim dhe Verifikim të Pronës, Naser Shala, edhe një herë është bërë subjekt i reagimeve të ambasadave perëndimore në Kosovë. Ambasadori amerikan, Philip S. Kosnett, ka reaguar edhe njëherë kundër Naser Shalës, duke kërkuar largimin e tij nga ai post.
Sipas Kosnett, përderisa “kreu i pakualifikuar i kësaj agjencie”, Naser Shala, mbetet në detyrën e drejtorit të AKVP, “padyshim se do të zvogëlohet besimi i qytetarëve për zgjedhjen në bazë të kriterit të meritës”.
“Rrugë e duhur për të gjithë të emëruarit e pakualifikuar është dorëheqja. Është koha që partitë të propozojnë zgjidhje për t’i dhënë fund korrupsionit dhe nepotizimit”, ka shkruar Kosnett në Twitter,
Reagimin e ambasadorit Kosnett e ka mbështetur dhe shpërndarë edhe ambasadori britanik në Kosovë, Ruairí O’Connell.
“Jam plotësisht dakord. Ai është i pakualifikuar, i paaftë dhe nuk duhej të ishte emëruar kurrë. Qeveria Britanike ndihmoi procesin që tregoi se kishte një kandidat të kualifikuar, por shumica e deputetëve në Kuvend, nga shumë parti, preferuan nepotizmin dhe favorizimet e ndërsjella në shërbimin publik të kualifikuar dhe të pavarur. Një fyerje për taksapaguesit britanikë: kjo është arsyeja pse unë pata dhanë dorëheqje. Nuk është çudi që edhe SHBA-të po e humbasin durimin”, ka shkruar O’Connell.
.
