Qendra “Gjenocidi në Kosovë – Plagë e Hapur”, sot ka kërkuar mobilizim, që gjenocidi i përjetuar nga populli i Kosovës të bëhet i njohur në përmasa botërore.
Qendra “Gjenocidi në Kosovë – Plagë e Hapur” ka potencuar se mobilizimi është domosdoshmëri, duke pasur parasysh se është njëra nga format më efikase të ndërkombëtarizimit dhe njohjes politike të gjenocidit nga vendet e botës demokratike.
“Më 28 shkurt dhe 1 mars të vitit 1998, forcat e armatosura të Serbisë filluan zbatimin e projektit të gjenocidit ndaj shqiptarëve të Kosovës duke vrarë 24 civilë në fshatrat Likoshan dhe Qirez të Komunës së Skenderajt.
Nga data 28 shkurt 2023 e deri më 12 qershor 2024 janë qindra masakra që do të përkujtohen në 25 vjetorin e kryerjes së këtyre akteve gjenocidare. Prandaj e shohim tepër të rëndësishme që të gjitha institucionet shtetërore, politike, organizatat joqeveritare dhe shoqëritë artistike, kulturore dhe sportive të mobilizojnë të gjitha energjitë që ta bëjmë të njohur në përmasa botërore gjenocidin që ka përjetuar populli shqiptar i Kosovës.”, është bërë e ditur në komunikatë, duke shtuar se popujt e tjerë që kanë qenë viktima të gjenocidit kanë ndjekur këtë rrugë.
Sipas Qendrës “Gjenocidi në Kosovë – Plagë e Hapur, duhet të shfrytëzohen të gjitha resurset intelektuale e organizative, qeveritare e joqeveritare, që ta informohet opinioni publik ndërkombëtar për tragjedinë kombëtare të përjetuar gjatë luftës 1998-1999.
Po ashtu, u kërkua që të shndërrohet viti 2023 dhe 2024 në vit i informimi të plotë për gjenocidin, me qëllim që drejtësia të triumfojë.
“Në manifestimet për 50-të vjetorin e gjenocidit ndaj armenëve nga Perandoria Osmane që u organizuan në katër anët e globit ku ishin shpërndarë të mbijetuarit e këtij gjenocidi, ndodhi njohja e parë politike ndërkombëtare e tragjedisë që kishte përjetuar ky popull. Nëse përcillet me vëmendje kronologjia e njohjeve tjera politike ndërkombëtare të gjenocidit armen do të shohim se manifestimet përkujtimore në vitet jubilare kanë luajtur një rol të madh në sensibilizimin e qarqeve politike dhe intelektuale. E njëjta gjë ndodhi edhe me gjenocidin e Perandorisë Gjermane ndaj grupeve etnike herero dhe nama. Më 14 gusht 2004, me rastin e 100 vjetorit të Betejës së Waterbergut, e cila simbolizon fillimin e gjenocidit që kanë kryer forcat shtetërore gjermane dhe kolonët gjermanë në Namibi, ministrja gjermane për Bashkëpunim ekonomik dhe zhvillim, Heidemarie Wieczorek-Zeul pranoi se “ajo që kishte ndodhur në të kaluarën ishte një luftë shfarosëse që sot e quajmë gjenocid”. Ndërsa, dhjetë vjet më vonë, në vitin 2015, në kontekst të përkujtimit të 100 vjetorit të gjenocidit armen, kur Gjermania mori përsipër edhe përgjegjësinë e vet si aleate e Perandorisë Osmane, ministri gjerman i Punëve të Jashtme Frank-Walter Steinmeier pranoi se lufta 1904-1908 mund të cilësohet “si krim lufte dhe si gjenocid”. Në këtë kontekst historik, në fund të vitit 2015 Gjermania dhe Nigeria filluan bisedimet për këtë çështje, të cilat u përmbyllën më 28 maj 2020. Gjermania Federale njohu zyrtarisht se ka kryer këtë gjenocid dhe u angazhua për të paguar një miliard euro si ndihma për zhvillim të Namibisë. Duke parë rezultatet që kanë arritur populli armen dhe ai i Namibisë, sidomos në vitet jubilare të gjenocidit që u ka ndodhur atyre, del se organizimi ynë për sensibilizimin e opinionit botëror është më se i nevojshëm. Për këtë arsye duhet të shfrytëzojmë të gjitha resurset intelektuale e organizative, qeveritare e joqeveritare, që ta informojmë opinionin publik ndërkombëtar, qarqet intelektuale dhe institucionet politike anekënd botës për tragjedinë kombëtare që kemi përjetuar gjatë luftës 1998-1999. Me një fjalë: Ta shndërrojmë vitin 2023 dhe 2024 në vit informimit të plotë për gjenocidin që kemi përjetuar, me qëllim që drejtësia të triumfojë.”, u bë e ditur tutje në komunikatë.
Qendra “Gjenocidi në Kosovë-Plagë e hapur” shprehu gatishmërinë të ndihmojë në organizimin e manifestimeve jubilare në këtë çerek shekulli të krimit të gjenocidit ndaj shqiptarëve të Kosovës.
Shpërndaje në
SONDAZH
Loading ...
