Sot është bërë një organizim për të shënuar 15-vjetorin e Pavarësisë së Kosovës, i cili u zhvillua në Beograd.
Pjesëmarrëse në këtë organizim ishte edhe këshilltarja Politike e Kryeministrit të Republikës së Kosovës për Preshevë, Medvegjë dhe Bujanoc, Ardita Sinani, e cila e quajti këtë organizim, simbolikë shumë domethënëse.
“Nga të gjitha, shenimi i përvjetorit të 15 të Pavarësisë së Republikës së Kosovës në Beograd ishte i veçantë. Simbolikë shumë domethënëse. Pikërisht sepse njohja e realitetit nga kryeqendra e Serbisë për Republikën e Kosovës, do të jetë shans për demokratizimin e Serbisë”.
“Njohja e realitetit nga ana e Serbisë për Republikën e Kosovës dhe respektimi i parimit të reciprocitetit të të drejtave të pakicave në shtetet respektive, është garancë për paqe afatgjate të Ballkanit Perëndimor”, ka shkruar ajo në Facebook.
I pranishëm ishte edhe Kryetari i Këshillit Kombëtar të Shqiptarëve të Luginës, Ragmi Mustafi, i cili u shpreh se ishte një emocion i veçantë, përcjell Klankosova.tv.
“Përveç përfaqësuesve institucional e politik të Luginës së Preshevës, prezent ishin edhe përfaqësuesit e shoqërisë civile në Beograd, e përfaqësues të misioneve diplomatike ndërkombëtare. Emocion i veçantë. Gëzuar Kosovë”, ka shkruar ai në Facebook.
E pas përfundimit të këtij organizimi, deputeti shqiptar në Kuvendin e Serbisë, Shaip Kamberi, ka publikuar disa pamje nga atje.
“Foto album nga shënimi i 15 vjetorit të Pavarësisë në Beograd. Kjo është hera e parë që nga hapja e Zyrës ndërlidhëse që shënohet Dita e pavarësisë së Kosovës në Beograd”, ka shtuar Kamberi.
