Bordi Ekzekutiv i Fondit Monetar Ndërkombëtar (FMN) ka mbajtur më 25 janar konsultimin vjetor për Kosovën, ku u konkludua se rritja e çmimeve të energjisë dhe artikujve ushqimorë pas luftës së Rusisë në Ukrainë ka ulur kërkesën dhe rritja reale Bruto Produktit Vendor për vitin 2022 vlerësohet të jetë nga 2.5 – 3%, pas rikuperimit prej 10.7% në vitin 2021.
FMN ka vlerësuar se norma mesatare e inflacionit për vitin 2022 ka qenë mbi 11%.
Bordi Ekzekutiv i FMN-së i ka kërkuar Kosovës që ta rris transparencës dhe ta luftojë korrupsionin, që vlerësohen pika të rëndësishme për ta përmirësuar ambientin biznesbërës në vend.
“Bordi Ekzekutiv u kërkoi autoriteteve (të Kosovës) të adresojnë boshllëqet e qeverisëse, të rrisin më tej transparencën dhe të reduktojnë korrupsionin, të cilat mbeten thelbësore për të përmirësuar mjedisin e biznesit në Kosovë dhe për të rritur rritjen e mundshme. Drejtorët nënvizuan gjithashtu rëndësinë e rritjes së kapacitetit të gjenerimit të energjisë së gjelbër për të rritur sigurinë e energjisë dhe për të ulur emetimet”, thuhet në njoftimin e FMN-së.
Organizata ka parashikuar rritje të aktivitetit ekonomik prej 3.5% në vitin 2023.
“Ky parashikim varet në mënyrë thelbësore nga supozimi se çmimet ndërkombëtare të mallrave do të bien në vitin 2023. Pasiguria rreth perspektivës mbetet e lartë; Çmimet më të larta të energjisë përfaqësojnë rrezikun kryesor. Megjithëse politikat e shëndosha fiskale dhe financiare do të ndihmojnë në zbutjen e ndikimit të rreziqeve negative, reformat strukturore që adresojnë boshllëqet e infrastrukturës dhe qeverisëse janë thelbësore për të diversifikuar motorët e rritjes në Kosovë dhe për të krijuar kushtet për rritje më të gjelbër ekonomike”, thuhet tutje.
Po ashtu, Bordi Ekzekutiv e ka përgëzuar reagimin e shpejtë të politikave të institucioneve të Kosovës, që sipas vlerësimit, kanë ndimuar në zbutjen e ndikimit të krizave tregtare tek familjet dhe bizneset.
“Ata inkurajuan angazhimin e vazhdueshëm ndaj politikave të kujdesshme të kombinuara me një agjendë të rigjallëruar të reformave strukturore për të zhbllokuar rritjen. Angazhimi i vazhdueshëm i ngushtë i Fondit mund ta ndihmojë Kosovën që të avancojë përpjekjet e saj për reforma dhe të tejkalojë pengesat politike”, thuhet tutje.
Shpërndaje në
SONDAZH
Loading ...
