Kryetari i Kuvendit, Glauk Konjufca, ka folur në seancën solemne të Kuvendit për Epopenë e UÇK-së.
Me një fjalim emocionues, me detaje interesante, Konjufca fillimisht ka thënë se luftën si ajo e familjes Jashari nuk e njeh as historia e botës.
“Lufta e Prekazit është ngjarje e pashembullt jo vetëm në historinë tonë. Një të ngjashme nuk e njeh as historia e botës. Familja e gjerë Jashari, tre breza në kullën e tyre, në tokën e lashtë nga baci Shaban e deri te Blerimi i vogël e shpallën lirinë e popullit tonë dhe embrojtën atë deri në vetëflijim. Lufta e tyre ishte legjendare. Sakrifica sublime, saqë kombi shqiptar kaloi në një dimension tjetër të vetëdijes”, tha Konjufca.
“Kur flasim për Jasharajt, lavdia e të gjallëve është jo më e pakët se e të rënëve. Besarta mbijetoi për ta ndarë me ne qendresën legjendare dhe flijimin e familjes së saj. Zoti u kujdes që dëshmia të jetojë. Shpesh më del para syve momenti kur baci Rifat kthehet në Prekaz mes varreve të freskëta. Me atë ecje titanike ai barte mbi supet e tij, krejt dhimbjen tonë historike por edhe krenarinë tonë më të madhe”, theksoi Konjufca në Kuvend.
“I kishte humbur 55 anëtarë të familjes prej tyre gruan dhe 4 fëmijët e tij. Ishte ai që i ngushëllonte të tjerët, familjarët e gjallë, ushtarët e UÇK-së e bashkëfshatarët. Vetëm për 1 minut mundohuni ta zini vendin e baçit Rifat, dhe më thoni a nuk është ky definicioni i heroit të gjallë”, përfundoi ai fjalën e tij.
Krerët e shtetit kishin bërë homazhe në Prekaz, e u pritën edhe në odën e familjes.
