PRISHTINË | 04 JAN 2020 | Nga KosovaLive
Ministria e Punëve të Jashtme e Republikës së Kosovës përmes një njoftimi për media thotë se alarmuar Bashkimin Evropian për arrestimin e Nezir Mehmetajt.
Sipas njoftimit për media, Zyra Ndërlidhëse e Kosovës në Beograd është aktive dhe po merr të gjitha masat e duhura për të siguruar lirimin e Nezir Mehmetaj, familja e të cilit tashmë ka angazhuar edhe një avokat lokal.
MPJ thotë se Mehmetaj është transferuar në qendrën e paraburgimit në Beograd, është marrë në pyetje nga hetuesit serbë dhe po rëndohet me akuza politike.
“MUP-i serb ka kryer krime lufte në Kosovë, dhe ky institucion, si i tillë, nuk mundet dhe nuk do të jetë në gjendje të luajë kurrë një rol drejtësie ndaj shtetasve kosovarë. Nëse ndonjë institucion apo individ është përgjegjës për krimet e luftës në Kosovë, është vet MUP-i serb, udhëheqja e tij e mëparshme dhe aktuale”, thuhet në njoftim.
Ministria e Punëve të Jashtme thotë se është në kontakt të ngushtë me Brukselin, dhe ka lajmëruar institucionet e Bashkimit Evropian për arrestimin e Mehmetaj, si dhe praktikën e vazhdueshme nga Serbia të ndalimit të shtetasve kosovar.
“Serbia nuk mund të pengojë më pafund lëvizjen e lirë të njerëzve dhe duhet të ndalojë me përndjekjet dhe arrestime politike të shtetasve kosovar. Kjo praktike është në kundërshtim me marrëveshjen e Brukselit dhe Bashkimi Evropian, nga ana tjetër, duhet të marrë masa urgjente për të parandaluar veprimet e Beogradit kundër qytetareve të Kosovës dhe për të siguruar lëvizjen e lirë të qytetarëve”, thuhet tutje në njoftim.
Ministria e Punëve të Jashtme thotë se mbetet e angazhuar në mënyrë aktive për të siguruar lirimin e Neziraj dhe kthimin e tij në familjen e tij.
Në të njëjtën kohë, Ministria e Punëve të Jashtme përsërit thirrjen e majit 2019, me anë të së cilës nxiten qytetarët e Kosovës që të shmangin udhëtimet drejt dhe përmes Serbisë, për shkak të ndjekjes politike të shtetasve kosovarë me akuza të motivuara politikisht nga qeveria serbe.
Shpërndaje në
SONDAZH
Loading ...
