Deputetja e Partisë Demokratike të Kosovës, Ariana Musliu-Shoshi, ka reaguar pas vendimit të Gjykatës Speciale për dënimin me 26 vjet burg të komandant Calit.
Musliu-Shoshi, në një status në Facebook, ka shkruar se populli i Kosovës nuk i bën gjyqin atyre qe ua kanë sjellur lirinë dhe se Gjykata Speciale po bën padrejtësi.
“Ushtria Çlirimtare e Kosovës për asnjë moment nuk ka qenë agresori dhe kryesi i krimeve kundër njerëzimit! Në të kundërtën, nuk do të kishte mobilizim e ndërhyrje të të gjithë botës perëndimore për të përfunduar luftën e Kosovës për liri e pavarësi. Kjo Gjykatë, me këtë vendim, dëshmoi që ka një agjendë të qartë, e atë agjendë po mundohet ta shtyejë “në emër të popullit të Kosovës”” ka shkruar Musliu-Shoshi.
Ajo tutje ka thënë se vendimi i sotëm duhet të apelohet dhe të kontrollohet kjo Gjykatë.
Musliu-Shoshi u ka bërë thirrje institucioneve që të ndërmarrin masa me aleatët, për të mos lejuar përbaltjen e luftës çlirimtare të popullit tonë.
Ky është reagimi i plotë i saj:
Populli i Kosovës nuk i bën gjyqin atyre që ua sollën lirinë.
Për më tepër, kjo Gjykatë që do të duhej të sillte drejtësi, “në emër të popullit të Kosovës” po bën padrejtësi, duke u munduar që ta ndryshojë historinë e luftës së lavdishme çlirimtare.
Ushtria Çlirimtare e Kosovës për asnjë moment nuk ka qenë agresori dhe kryesi i krimeve kundër njerëzimit! Në të kundërtën, nuk do të kishte mobilizim e ndërhyrje të të gjithë botës perëndimore për të përfunduar luftën e Kosovës për liri e pavarësi. Kjo Gjykatë, me këtë vendim, dëshmoi që ka një agjendë të qartë, e atë agjendë po mundohet ta shtyejë “në emër të popullit të Kosovës”.
Pavarësisht kësaj, drejtësia gjithmonë triumfon! Ky verdikt duhet të apelohet, e kjo Gjykatë duhet të kontrollohet! I bëj thirrje institucioneve të vendit të ndërmarrin masa të bashkërenduara me aleatët tanë, në mënyrë që të mos lejojnë përbaltjen e luftës sonë çlirimtare, nga një institucion i cili në vend të drejtësisë, po legjitimon padrejtësinë.
