Emri i kryeministrit të ri të Britanisë pritet të bëhet publik të martën, derisa në garë për këtë pozitë janë Boris Johnson dhe Jeremy Hunt. Rezultati i votimit të rreth 160 mijë anëtarëve të Partisë Konservatore do të kuptohet më vonë gjatë ditës në Londër.
Fituesi do të kthehet zyrtarisht në Kryeministër gjatë ditës së mëkurë. Johnson, ish-kryetar i Londrës, konsiderohet favorit për këtë pozitë. Kryeministrja britanike,
Theresa May, e cila ka dhënë dorëheqje në shenjë revolte pas mospërkrahjes së politikës së saj për largim të Britanisë nga BE-ja do të drejtojë mbledhjen e fundit të kabinetit britanik, ditën e martë. Hunt, Sekretar i Jashtëm britanik, ka thënë se synon të sigurojë një Brexit me marrëveshje.
Johnson në anën tjetër, ka thënë se kërkon që patjetër të largojë Britaninë nga BE-ja më 31 tetor, duke përfshirë mundësinë e largimit pa marrëveshje.
Britania pritet të largohet nga BE-ja më 31 tetor të këtij viti, mirëpo fillimisht parlamenti në Mbretërinë e Bashkuar duhet të miratojë kushtet e largimit. Vendimi për Brexit ka ardhur pasi 52 për qind e votuesve kanë votuar për dalje të Britanisë nga BE-ja kundruall 48 për qind që kanë kundërshtuar atë, në referendumin e mbajtur më 2016.
