Dy gra që torturuan dhe vranë papagallin femër të një shoku janë burgosur nga një gjykatë britanike, ndërsa gjykatësi përshkroi mizorinë që ato treguan me krijesën e pambrojtur.
Tracy Dixon, 47 vjeç dhe Nicola Bradley, 35 vjeç, spërkatën zogun, një papagall gri afrikan i quajtur “Sparky”, me pastrues furre, e mbuluan me bojë dhe u përpoqën t’ia jepnin qenit. Më pas e futën në tharësen e rrobave dhe e ndezën pajisjen.
Të dyja të pandehurat u përpoqën të fajësonin njëra-tjetrën, por nuk arritën të bindin gjyqtarin që i dënoi me 25 muaj burg të martën e kaluar në Gjykatën e Kurorës Carlisle.
Sipas tij, të dyja gratë janë fajtore për “torturën sadiste” të papagallit që e vrau përfundimisht.
“Me të vërtetë është përtej mendjes sime se si një njeri mund të trajtojë një kafshë kështu.”
Zogu fatkeq i përkiste Paul Crooks , një miku i grave, i cili më 30 korrik priti dy gratë për disa orë në shtëpinë e tij. Sipas Guardian, dy femrat britanike i kishin telefonuar mikut të tyre për t’i marrë në orët e para të mëngjesit nga klubi i natës ku po qëndronin, sepse ishin shumë të dehura për të shkuar në shtëpi.
Pasi i çoi në shtëpi, Crooks shkoi në shtrat, ndërsa dy gratë vazhduan të pinin.
Kur Crooks u zgjua në 8:30 të mëngjesit, ai zbuloi se të ftuarat e tij kishin derdhur shkumë rruajtjeje mbi kafazin e Sparky. Burri pastroi kafazin dhe më pas u largua për të bërë pazar pasi i paralajmëroi dy gratë që të mos e prekin më kafshën e tij.
Kur u kthye, ai e gjeti zogun të pavetëdijshëm, me kokën e tij të vogël të varur nga kafazi. Në fillim gratë mohuan se kishin bërë diçka, por pas pak pranuan se e kishin spërkatur papagallin me lëndë pastruese dhe lustrim mobiljesh dhe se e kishin goditur me peshqir.
Në deklaratën e tij në gjykatë, Crooks tha se që nga incidenti ai ka pasur sulme të vazhdueshme paniku dhe ka probleme me gjumin. Siç shpjegoi ai, jeta e tij nuk është më e njëjtë pa “Sparkyn” karizmatike, e cila mund të këndonte “God Save The Queen” dhe fitoi zemrat e të gjithë atyre që e njihnin.
Shpërndaje në
SONDAZH
Loading ...
