Një artikull i botuar nga Qendra Kërkimore e Ankarasë për Studimet e Krizave dhe Politikave (ANKASAM) thotë se lufta në Ukrainë dhe konflikti kino-amerikan mbi Tajvanin kanë përqendruar vëmendjen në marrëdhëniet e tensionuara midis Gjermanisë dhe SHBA-së.
Artikulli i shkruar nga Cenk Tamer, thekson se Amerika po përpiqet të mbajë krizat në botë nën kontrollin e saj dhe t’i përdorë ato si një mjet presioni ndaj vendeve aleate. Ukraina dhe Tajvani janë më të spikaturit nga këto probleme dhe të dyja janë “pika të dobëta” për Gjermaninë. Berlini prej shumë vitesh zhvillon partneritete serioze me Moskën dhe Pekinin në fushën e ekonomisë dhe energjisë dhe ka hyrë në marrëdhënie të ngushta me ta. Prandaj, Gjermania, me të gjitha llogaritë, nuk do të jetë në gjendje t’i heqë qafe këto partneritete në një afat të shkurtër, prandaj është e detyruar t’i bindet SHBA-së për një kohë.
Presion i fortë
Tamer vë në dukje se Gjermania është nën presion të fortë nga Uashingtoni, i cili po kërcënon të tërheqë mbështetjen për sigurinë evropiane nëse Berlini nuk i përgjigjet kërkesave të tij për t’u anuar me të në konfliktin me Rusinë në Ukrainë dhe konfliktin me Pekinin për Tajvanin. Ai shton gjithashtu se pjesëmarrja e Gjermanisë në mbështetjen ushtarake për Ukrainën vjen si një përgjigje ndaj presionit amerikan.
Në të njëjtën kohë, Tamer thekson se Gjermania i ka vendosur disa kushte Shteteve të Bashkuara në këmbim të mbështetjes së Ukrainës me tanke, gjë që shihet si një lloj sfide për Uashingtonin dhe është e barabartë me daljen përtej kontrollit amerikan. Berlini vendosi kushtin për dërgimin e tankeve Leopard 2 që të ishte “në kuadër të domosdoshmërisë”, sipas asaj që njoftoi qeveria e Shultz-it, dhe ky është i njëjti kusht që Uashingtoni vendosi për dërgimin e tankeve amerikane Abrams në Kiev.
Tamer thekson se gjëja kryesore që shqetëson Berlinin është mundësia që aleatët e NATO-s të hyjnë në një konflikt të drejtpërdrejtë me Rusinë për armët e furnizuara në Ukrainë dhe në këtë mënyrë të tërheqin të gjithë Evropën në një luftë në të cilën, nëse ndodh, Evropa do të jetë më e prekura dhe jo Shtetet e Bashkuara të Amerikës.
Reduktimi i trupave dhe akuzat për tradhti
Autori thekson se kriza për kostot e mbrojtjes mes Amerikës dhe Evropës, e cila filloi nën ish-presidentin Donald Trump, është ende në vazhdim. Trump ka kërcënuar të tërhiqet nga NATO nëse vendet evropiane nuk i rrisin shpenzimet e mbrojtjes në dy për qind të buxheteve të tyre. Uashingtoni beson se nuk mund të përballojë vetëm kostot e mbrojtjes së Evropës dhe se Evropa duhet të forcojë mbrojtjen e saj. Uashingtoni, përveç kësaj, filloi të zvogëlojë numrin e ushtarëve të tij në Gjermani, para fillimit të luftës në Ukrainë, për ta rritur përsëri këtë numër pas shpërthimit të saj.
Sipas autorit, vizita e Schultz-it në Pekin në nëntor shkaktoi reagime të stuhishme nga ekspertët amerikanë, të cilët e panë këtë zhvillim si tradhti të Gjermanisë ndaj Shteteve të Bashkuara të Amerikës. Kështu Tom Rogan, një gazetar amerikan dhe ekspert i politikës së jashtme, shkroi një analizë në të cilën ai theksoi se Gjermania nuk mund të veprojë lirshëm për sa kohë që është nën mbrojtjen e Amerikës (NATO) dhe se Uashingtoni nuk duhet të injorojë këtë lloj “tradhtie” nga Berlini. Rogan madje sugjeroi lëvizjen e trupave amerikane nga Gjermania në Poloni ose në vendet baltike për t’i dhënë një mësim Berlinit.
Shpërndaje në
SONDAZH
Loading ...
