SHBA-ja ka “përcaktuar zyrtarisht” se Rusia ka kryer krime kundër njerëzimit në Ukrainë, ka thënë zëvendëspresidentja e SHBA-së, Kamala Harris.
Duke folur në Konferencën e Sigurisë në Mynih, Harris akuzoi Rusinë për “akte të tmerrshme të vrasjes, torturës, përdhunimit dhe dëbimit” që nga pushtimi i saj.
Ambasadori i Moskës në SHBA hodhi poshtë pretendimet dhe akuzoi Harrisin për përpjekje për të “demonizuar Rusinë”.
Udhëheqësit botërorë në konferencë bënë thirrje për mbështetje afatgjate të Ukrainës.
Kryeministri i Mbretërisë së Bashkuar Rishi Sunak tha se tani ishte koha për të “dyfishuar” mbështetjen ushtarake, raporton BBC.
Ai argumentoi se aleatët perëndimorë duhet të fillojnë të planifikojnë për sigurinë e ardhshme të Ukrainës, si dhe të dërgojnë armët që i nevojiten për të mbrojtur veten tani.
Konferenca në Gjermani vjen pasi afrohet njëvjetori i pushtimit të plotë të Ukrainës nga Rusia më 24 shkurt.
Harris u tha delegatëve se autorët e krimeve të dyshuara ruse në Ukrainë duhet të mbajnë përgjegjësi.
“Veprimet e tyre janë një sulm ndaj vlerave tona të përbashkëta dhe njerëzimit tonë të përbashkët,” tha ajo.
OKB-ja i përkufizon krimet kundër njerëzimit si një “sulm i përhapur ose sistematik” ndaj një popullsie të caktuar civile.
Moska ka mohuar në mënyrë të përsëritur të ketë shënjestruar civilët gjatë pushtimit të saj.
Anatoli Antonov, ambasadori i Rusisë në SHBA, tha se pretendimet e zëvendëspresidentes amerikane ishin një përpjekje cinike për të “demonizuar Rusinë në rrjedhën e një lufte hibride”.
Shpërndaje në
SONDAZH
Loading ...
