Përmes një njoftimi, Gjykata Speciale ka bërë të ditur se është zgjatur afati i aplikimit për viktimat deri në mbylljen e paraqitjes së provave nga ana e Prokurorisë në rastin e Pjetër Shalës.
“Në vendimin e vet më të fundit për të drejtat procedurale të viktimave gjatë gjykimit, të bërë publik më 6 mars 2023, trupi gjykues në çështjen Shala, mes tjerash, vendosi që të zgjasë afatin për dorëzimin e kërkesave të viktimave për pjesëmarrje në procedura deri në mbylljen e paraqitjes së provave nga ZPS-ja”, thuhet në këtë njoftim.
Tutje, bëhet e ditur se trupi gjykues e konsideroi një vendim të tillë të përshtatshëm, në pajtim me Rregullën 9 (5) të Rregullores, për shkak të rrethanave të çështjes dhe situatës së përgjithshme të sigurisë në Kosovë, raporton “Betimi për Drejtësi”.
Ndryshe, Shala u arrestua më 16 mars 2021, nga autoritetet belge dhe u transferua në Hagë më 15 prill 2021, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.
Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur në Kosovë dhe në lidhje me këtë konflikt.
“Krimet për të cilat akuzohet z. Shala u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës”, thuhet në komunikatë.
Shpërndaje në
SONDAZH
Loading ...
