Deputetët e Listës Serbe janë kthyer sot në Kuvendin e Kosovës, pas pesë muajsh mungesë.
Seanca e sotme po mbahet në një sallë alternative. Por, ata nuk kanë qëndruar gjatë para se të largoheshin nga salla, shkruan gazeta online Reporteri.net.
Ata u larguan ndërkohë që fjalën e kishte deputeti i LDK-së, Driton Selmanaj. Selmanaj e nisi fjalimin duke thënë se kjo sallë ku sot po mbahet seanca do të mbahet mend për dy raste, i pari për gazin lotsjellës dhe i dyti për tia vazhduar Listës Serbe mandatet që i rrezikonin t’i humbnin.
“Në memoaret e historisë së parlamentarizmit tonë, kjo sallë do të mbahet mend dy herë për të mbajtë seancë plenare. Rasti i parë është për gazin lotsjellës dhe ai i dyti për me ia vazhdu Listës Serbe mandatet sepse rrezikonin të humbin ato, tha Selmanaj.
Në këtë moment deputetët e Listës Serbe lëshuan sallën.
Sipas Kushtetutës së Kosovës, mandati i deputetit mbaron ose bëhet i pavlefshëm nëse ai mungon 6 muaj rresht në seancat e Kuvendit.