Ngërçi për konstituimin e Kuvendit të Kosovës po vazhdon, ndërsa sot pritet tentativa e nëntë për zgjedhjen e kryetarit të Kuvendit. Aleanca për Ardhmërinë e Kosovës ka konfirmuar se do të marrë pjesë në seancë, por nuk do ta ndryshojë qëndrimin lidhur me votën.
Deputetja e kësaj partie, Time Kadrijaj, ka thënë se AAK-ja do të qëndrojë kundër kandidaturës së Vetëvendosjes.
“Ne ende u qëndrojmë pas qëndrimeve që i kemi pasë do të shkojmë në seancë, por do të votojmë kundër sërish”, ka deklaruar Kadrijaj për media.
Kjo vjen pas tetë tentativave të pasuksesshme për ta konstituuar Kuvendin, ku Albulena Haxhiu – e propozuar nga Lëvizja Vetëvendosje – nuk ka arritur t’i marrë votat e mjaftueshme për t’u zgjedhur kryeparlamentare. Në seancën e 29 prillit, ajo nuk siguroi përkrahjen as në përpjekjen e gjashtë të saj.
