Tensionet në veri të Kosovës shkaku i barrikadave të vendosura nga grupet kriminale dhe largimi i serbëve nga institucionet, po konsiderohen nga njohësit e çështjeve politike si realizim të skenarit nga ana e Serbisë.
Për rreth një muaj, veriu i Kosovës ishte i bllokuar nga barrikadat, ndërsa Kosova e Serbia dukeshin si në luftë me njëra-tjetrën.Analistët thonë se synim i Serbisë është edhe refuzimi i planit franko-gjerman, që së fundmi po quhet edhe plani “evropian”.
Profesori universitar, Ibrahim Gashi, thotë për Ekonomia Online, se Serbia ka synuar që me këto bllokada ta zhbëjë konsolidimin e shtetit të Kosovës.
Gashi thotë se pala serbe dëshiron që në veri të ketë konflikte, pasi në atë mungojnë autoritetet e Kosovës.
“Zhvillimet e fundit, dalja e serbëve nga institucionet e ka realizuar një pjesë të skenarit të Serbisë për ta nxjerrë nga binaret konsolidimin e shtetit të Kosovës. Ndoshta këtu mund të thuhet se jemi ngut me këto marrëveshjet për targat e me shpalljen e zgjedhjeve pa i konsumuar të gjitha mundësitë me u rikthyer ata”.
“Tani kjo i konvenon shumë Serbisë, unë nuk dëshiroj me besuar që po rrëshqasim, andej por ajo që shumë i konvenon Serbisë është rikthimi i konfliktit të ngrirë në atë pjesë, ku autoritetet e Kosovës politike e administrative, nuk kanë akses, pra kjo i konvenon shumë Serbisë”.
Teksa ka folur për vendimin e Qeverisë për rikthimin e targave ilegale në ato legale, Gashi thotë se Qeveria është dashur ta shtojë sigurinë për serbët që i rikthyen ato.
“Qeveria ka qenë në të drejtën e saj, pra bëhet fjalë për një marrëveshje të nënshkruar nga palët që nuk është implementuar pjesa që ka të bëjë me Serbinë, dhe tani ndoshta kur është vendos kjo masë, ndoshta është dashur të rriten masat e sigurisë për serbët që janë të gatshëm për t’i ndërruar targat”, u shpreh Gashi për EO.
E analisti politik, Gazmir Raci, thotë se Kosova ka arritur që ta rikthejë këtë propozim në tryezën e bisedimeve.
Sipas tij, Serbia duhet ta qartësojë nëse është pro apo kundër këtij plani.“Kosova ja ka arrit qëllimit të saj në kuadër të dialogut, sepse e ka rikthyer propozimin franko-gjerman në tryezë.
“Tashmë po dihet që Serbia përmes barrikadave ka tentuar me sabotuar fillimin e diskutimeve për këtë plan, por nuk ia arriti, barrikadat i hoqi vetë ashtu siç i vendosi vet dhe tashmë duhet t’i kthehen tryezës dhe duhet të japë përgjigje përfundimtare Serbia se a është pro apo kundër planit franko-gjerman, sepse nuk mund të luajë më. Në njërën anë ministri i Jashtëm serb thotë se jemi kundër planit, ndërsa presidenti thotë se ende nuk e kemi dhënë përgjigjen përfundimtare. Andaj Serbia ka probleme në politiken e saj të jashtme, edhe për planin franko-gjerman por edhe në raport me Rusinë, sepse ende nuk po mund të vendosë sanksione ndaj Rusisë”, thotë Raci për EO.
Ndërsa këtë plan, Raci e quan të mirë për të dyja palët, madje thotë se i ulë tensionet dhe e zgjidh problemin përkohësisht.
“Plani franko-gjerman është për të dyja palët, sepse i ulë tensionet, e zgjidh përkohësisht problemin, në mënyrë që të ecim drejtë anëtarësimit në NATO dhe në Bashkimin Evropian si Kosovë, por edhe Serbia mund të ecë më shpejtë drejtë anëtarësimit në BE, por duket qartë që Kosova dhe Serbia në BE të hyjnë së bashku. Nuk shoh presion, unë shoh angazhim të faktorit ndërkombëtar që palët me u rikthye në tryezë ashtu siç u morën vesh në dhjetor”.
Shpërndaje në
SONDAZH
Loading ...
