Deputeti Avdullah Hoti ka akuzuar qeverinë se e ka kthyer Serbinë si partner kryesor tregtar të Kosovës në rajon.
Ai në një postim në Facebook ka shkruar se gjatë periudhës janar-tetor 2022, krahasuar me periudhën e njëjtë të vitit 2021, janë importuar 850 milionë euro më shumë mallra nga jashtë.
Sipas tij, kjo për shkak se eksportet për këtë periudhë janë rritur vetëm me 154 milionë euro dhe deficiti tregtar është thelluar dhe ka arritur në -3.9 miliardë euro.
“Thellimi i deficitit tregtar e vë në dyshim rritjen ekonomike, të prodhimit vendor dhe të punësimit në Kosovë, siç po propagandohet nëpër konferenca ndërkombëtare”, ka shkruar ai.
Ai ka shkruar se nëse analizohet tregtia me vendet e Ballkanit Perëndimor, shihet se importet me të gjitha këto vende janë ulur pa përjashtim, përveç me Serbinë.
“Dikush mund të thotë se tregtia është e lirë dhe ajo i përcakton importet dhe eksportet. Dakord jam me këtë. Por tregtia e lirë ka ekzistuar edhe në vitet kur këta që sot qeverisin i rrotullonin kamionët me mallra nga Serbia”, ka thënë ai.
