Instituti i Kosovës për Drejtësi (IKD) ka reaguar lidhur me situatën e krijuar në seancën konstituive të Kuvendit të Kosovës, e cila u pezullua për shkak të mosvotimit të Raportit të Komisionit për Verifikimin e Mandateve dhe mungesës së kuorumit.
IKD fajëson paqartësitë ligjore dhe veçanërisht mungesën e dorëheqjes së kryeministrit në detyrë Albin Kurti dhe anëtarëve të kabinetit qeveritar si pengesë për formimin e institucioneve të reja.
Sipas IKD-së, problematika buron nga Ligji për Qeverinë Nr. 08/L-117, i cili nuk e rregullon në mënyrë të qartë momentin kur anëtarët e Qeverisë duhet të japin dorëheqje pas zgjedhjes si deputetë. Instituti thekson se në përputhje me frymën kushtetuese, dorëheqja duhet të ndodhë menjëherë pas dhënies së betimit si deputetë.
“Fillimisht, IKD në vazhdimësi ka theksuar se paqartësitë rreth çështjes së dorëheqjes së anëtarëve të kabinetit qeveritar janë krijuar si rezultat i mosrregullimit adekuat të Ligjit për Qeverinë Nr.08/L-117 për Qeverinë e Republikës së Kosovës. Tutje, IKD ka theksuar vazhdimisht se në frymën e funksionimit të institucioneve, dispozitat kushtetuese dhe ligjore në këtë situatë duhet të interpretohen në atë mënyrë që anëtarët e Qeverisë duhet të japin dorëheqje në momentin e dhënies së betimit si deputet.
Letra e dorëzuar nga Kryeministri në detyrë, z. Albin Kurti, nuk paraqet akt të dorëheqjes. Interpretimi i z. Kurti se Qeveria e tij ka statusin ekuivalent me Qeverinë në detyrë vlenë për Qeverinë si institucion dhe jo për të si kreu i saj. Përmbajtja e njoftimit të Kryeministrit tregon synimin e tij që ai të vazhdojë ta udhëheqë Qeverinë në detyrë edhe duke qenë deputet.
Në bazë të Ligjit NR.08/L-117 për Qeverinë e Republikës së Kosovës, Kryeministri duhet të jap dorëheqje në momentin e betimit të tij si deputet. Nga ky moment, Qeveria do të vazhdojë të funksionojë si qeveri në dorëheqje, por se nuk mund të udhëhiqet nga z. Kurti. Udhëheqja në këtë rast kalon tek zv. Kryeministri i Qeverisë në detyrë dhe postet ministrore udhëheqen nga zv. Ministrat. Përjashtim bëjnë rastet kur një ministër nuk është zgjedhur deputet, në këtë rast, ai mund të vazhdojë të ushtrojë detyrën”, thuhet në reagimin e IKD-së.
Për më tepër, IKD thekson se letra e dorëheqjes duhet të jetë e qartë, e drejtuar jo ish-kryetarit të Kuvendit Glauk Konjufca, por kryesuesit të seancës konstituive – në këtë rast, deputetit më të vjetër, Avni Dehari.
“Tutje, IKD thekson se letra e dorëheqjes duhet të jetë e qartë dhe mos të lejoj hapësira për interpretime. E njëjta letër nuk duhet t’i drejtohet ish-Kryetarit të Kuvendit, z. Glauk Konjufca. Aktualisht, deri në zgjedhjen e Kryetarit të ri të Kuvendit. Mbi këtë çështje, letra e dorëheqjes duhet drejtuar tek Kryesuesi i seancës konstituive, që sipas Rregullores së Kuvendit duhet të jetë deputeti më i vjetër, e që në këtë rast është z. Avni Dehari.
Krejt në fund, IKD u bënë thirrje të gjitha partive politike që duke respektuar Kushtetutën dhe ligjet në fuqi, të konstituojnë sa më shpejtë Kuvendin e Republikës së Kosovës dhe t’i hapet rrugë formimit të institucioneve të reja”, thuhet më tej në reagim.
