Ministrja e Jashtme e Gjermanisë, Annalena Baerbock u përplas me diplomatët kinezë sot, duke hedhur poshtë pretendimin e tyre se Perëndimi po i hedh benzinë zjarrit duke dërguar armë në Ukrainë. Ajo u tha atyre se është koha që Kina t’i thotë Rusisë të ndalojë agresionin e saj, shkruan The Guardian.
Kujtojmë se zëvendësambasadori kinez në Kombet e Bashkuara, Dai Bing, tha në Asamblenë e Përgjithshme të asaj organizate se pas një viti lufte në Ukrainë, “faktet brutale japin prova të mjaftueshme se dërgimi i armëve nuk do të sjellë paqe”.
“Shtimi i benzinës në zjarr vetëm do të përkeqësojë tensionet. Zgjatja dhe zgjerimi i konfliktit vetëm do t’i detyrojë njerëzit e zakonshëm të paguajnë një çmim edhe më të lartë,” tha ai. “Ne jemi të gatshëm të vazhdojmë të luajmë një rol konstruktiv në zgjidhjen e krizës ukrainase dhe të sjellim paqen sa më shpejt të jetë e mundur,” tha ai.
