Mjeku i përgjithshëm në Spitalin e Ferizajt, Astrit Hoxha ka thënë se kishte dyshime për gjendjen shëndetësore të akuzuarit, Dardan Krivaqa, për shkak, siç ka thënë ai, të përdorimit të substancave narkotike.
Këtë deklarim, Hoxha e bëri të martën, në Gjykatën Themelore të Ferizajt, ku Dardan Krivaqa bashkë me Arbër Sejdiun, po akuzohen për dhunimin dhe vrasjen e të ndjerës, Marigona Osmanit.
Mbrojtësi i të akuzuarit Krivaqa, avokati Admir Salihu, e ka pyetur dëshmitarin Dr.Astrit Hoxha, a keni përpiluar një raport për kontrollin e gjendjes shëndetësore të akuzuarit Krivaqa, që është bërë ditën kur është mbajtur seanca dëgjimore për caktimin e paraburgimit, dr. Hoxha tha se kishte përpiluar raport dhe kishte konstatuar se gjendja e të akuzuarit Krivaqa, ishte stabile.
“Unë kam pas dyshimet e mia, jam bazuar në raportin mjekësor dhe në gjendjen psikologjike të të akuzuarit Krivaqa, unë vetëm kam dyshuar nuk mund të them se kam qenë i saktë”, ka thënë Hoxha
Avokati Salihu, e ka pyetur dëshmitarin Hoxha, se a është e vërtetë që i njëjti ka dhënë dy deklarata për media, ku ka përshkruar gjendjen e të akuzuarit Dardan Krivaqa, se i njëjti e ka gjendjen e rëndë psikologjike dhe është në depresion, e që kjo gjendje e tij ishte për shkak të përdorimit të substancave narkotike.
Lidhur me këtë, Hoxha tha se e rithekson se pas kontrollës së të akuzuarit ka pas dyshimet e tij mbi gjendjen e rënduar psikologjike, por që nuk janë bërë analiza për të cilat nuk ishte fushë e tij, andaj tha se ajo çka ka theksuar për gjendjen e renduar psikologjike mos të merret për bazë pasi që mund të ishte mendim i gabuar.
Tutje, mbrojtësi i të akuzuarit Krivaqa, avokati Admir Salihu, ka propozuar që ndaj të mbrojturit të tij Dardan Krivaqa të bëhet një ekzaminim psikologjik, psikiatrik dhe psikotik nga Instituti i Psikiatrisë Forenzike.
“Propozoj të bëhet ky ekzaminim që ekspertët të sqarojnë gjendjen emocionale dhe shëndetësore, duke pasur parasysh se në vendin e ngjarjes janë gjetur elemente të substancave narkotike, andaj e konsideroj të rëndësishëm këtë ekzaminim në këtë fazë të procedurës”, ka thënë avokati Salihu.
Avokati Salihu, ka kërkuar që në rast të aprovimit të propozimit të tij, trupi gjykues të obligoj ekspertët që në detyrat që iu parashtrohen, t’iu parashtrohet edhe historiku kriminal i të akuzuarit Krivaqa dhe raporti mjekësor ku i akuzuari është duke vazhduar të trajtohet në qendrën e paraburgimit.
Prokurori Valdet Avdiu, nuk e ka kundërshtuar këtë propozim, ndërsa avokati i palës së dëmtuar, Gazmend Rexhepi e ka kundërshtuar propozimin e avokatit Salihu.
Ndërsa, kryetari i trupit gjykues, Sahit Krasniqi ka aprovuar propozimin e avokatit mbrojtës, Admir Salihu, kështu ka urdhëruar Institutin e Psikiatrisë Forenzike të bëj ekzaminimin forenzik të të akuzuarit Krivaqa.
Në këto rrethana seanca e radhës u shty për kohë të pacaktuar.
Gjyqtari i çështjes, Sahit Krasniqi më 2 shtator 2022, ka marrë aktvendim në bazë të së cilit i ka refuzuar kërkesat për hudhje të aktakuzës dhe kundërshtimet e provave, të parashtruara nga mbrojtja e të akuzuarve, ndërsa të akuzuarve Krivaqa dhe Sejdiu, iu konfirmua aktakuza.
Kurse, më 23 gusht 2022, “Betimi për Drejtësi” ka raportuar se mbrojtësit e të akuzuarve Dardan Krivaqa dhe Arbër Sejdiu, të cilët ngarkohen për vrasjen e 18-vjeçares Marigona Osmani në gusht të vitit 2021, kanë kërkuar hudhjen e aktakuzës.
Ndryshe, më 14 korrik 2022, është mbajtur seanca fillestare ku Dardan Krivaqa ka shfrytëzuar të drejtën të mbrohet në heshtje, kurse Arbër Sejdiu, është deklaruar i pafajshëm.
Krivaqën prokuroria e ngarkon me veprën penale vrasje e rëndë dhe dhunim, kurse Sejdiu po akuzohet për veprën penale vrasje e rëndë dhe ndihmë në kryerjen e dhunimit.
Sipas aktakuzës, i pandehuri Dardan Krivaqa më 21 gusht 2021, rreth orës 10:14, në banesën e tij në rrugën “Ramadan Rexhepi”, në Ferizaj, pa pëlqimin e tani të ndjerës Marigona Osmani, e kishte detyruar të njëjtën për të kryer marrëdhënie seksuale, e cila siç thuhet në aktakuzë përcillet me tortura.
Gjithnjë sipas aktakuzës, aty thuhet se i pandehuri Krivaqa fillimisht pa dëshirën e tani të ndjerës ka kryer marrëdhënie seksuale në sallon, pas kryerjes së aktit seksual të njëjtën të zhveshur e kishte dërguar në banjo, nga aty me dhunë e kishte dërguar në dhomën e gjumit, mirëpo me kalimin e kohës për shkak të gjendjes së rëndë shëndetësore tani e ndjera Marigona Osmani si pasojë e dhunës së ushtruar kishte humbur aftësinë për të rezistuar, e ku në dy raste në mbrëmje kishin kryer marrëdhënie seksuale, pastaj i pandehuri Dardan të zhveshur e kishte dërguar në banjë, e ku i vërehen edhe lëndimet në trup,
Me këtë, akuzohet se ka kryer veprën penale “Dhunimi” nga neni 227, par. 4, nënpar 4.1, lidhur me par.1 të Kodit Penal.
Sipas dispozitivit të dytë të kësaj aktakuze, i pandehuri Arbër Sejdiu më 21 gusht 2021, në banesën e të pandehurit të parë në rrugën “Ramadan Rexhepi”, në Ferizaj, me dashje i kishte ndihmuar të pandehurit Dardan Krivaqa në kryerjen e veprës penale të dhunimit.
Sipas aktit akuzues thuhet se fillimisht dy të pandehurit kishin kontaktuar përmes telefonit dhe ishin takuar në qytet, pastaj së bashku ishin kthyer në banesë, ku i pandehuri Arbër posa kishte arritur, duke qenë në dijeni se i pandehuri Dardan është duke e dhunuar tani të ndjerën Marigona Osmani, me dashje kishte marrë veprime me të cilat lehtësohet kryerja e dhunimit.
Tutje thuhet se dy të pandehurit së bashku kishin hyrë në dhomën ku kryhet dhunimi, e ku e ndjera ishte e zhveshur, e të cilin veprim gjatë qëndrimit në banesë e merr disa herë, po ashtu dhe gjatë asaj kohe kishte përcjellë gjendjen nëse ndonjë nga banorët është duke lëvizur aty pari.
Siç e përshkruan aktakuza, i pandehuri Arbër Sejdiu po ashtu edhe disa herë kishte dalë nga banesa për të blerë gjëra ushqimore, ndërsa gjatë gjithë kohës dy të pandehurit kishin biseduar mes vete, kështu tutje, të pandehurit Dardan Krivaqa i kishte dhënë telefonin për të thirrë kompaninë e cila menaxhon kamerën, që ishte e vendosur në korridorin e banesës me qëllim që të fshihen video-incizimet, gjegjësisht provat e veprës penale.
Me këtë, Sejdiu akuzohet se ka kryer veprën penale “Ndihmë në kryerjen e dhunimit” nga neni 227, par 4, nënpar. 4.1, lidhur me par. 1 dhe nenin 33 të Kodit Penal.
Kjo aktakuzë në dispozitivin e III-të, dy të pandehurit Dardan Krivaqa dhe Arbër Sejdiu i ngarkon për veprën penale të vrasjes së rëndë në bashkëkryerje.
Aty thuhet se më 22 gusht 2021, në banesën e të pandehurit Dardan Krivaqa, në rrugën “Ramadan “Rexhepi”, në Ferizaj, me dashje dhe në bashkëkryerje, me qëllim të fshehjes së veprës penale dhunimi e kanë privuar nga jeta tani të ndjerën Marigona Osmani, me të cilën i pandehuri i parë ishte në bashkësi jashtëmartesore.
Tutje, sipas aktakuzës, përshkruhet se në intervale kohore nga ora 10:56 deri në orën 14:43, i pandehuri i parë kishte marrë një shkop, e së bashku me të pandehurin e dytë kishin hyrë në dhomë dhe kishin filluar ta godasin tani të ndjerën në pjesë të ndryshme të trupit, me ç’rast të njëjtës i kanë shkaktuar dhimbje të mëdha fizike dhe psiqike, ku nga goditjet e njëjta ka pësuar politrauma-lëndime të shumëfishta, ku vdekja shkaktohet drejtpërdrejt nga asfiksia mekanike, si dhe shoku hemorragjik dhe traumatik, të cilat janë pasojë e gjakderdhjes së jashtme dhe gjakderdhjes së brendshme, nga thyerja e ashtit të nofullës së poshtme, thyerja e brinjëve, klavikulës së majtë, unazave të qafës, gjakderdhjes epidurale dhe subdurale në pjesën e pasme të trurit të madh dhe në trurin e vogël, këputje parciale të palcës së kurrit në qafë, të njëjtën e dërgojnë në Spitalin e Përgjithshëm – Qendrën Emergjente në Ferizaj dhe largohen nga aty.
Me këtë, akuzohen se në bashkëkryerje kanë kryer veprën penale “Vrasja e rëndë” nga neni 173, par. 1, nënpar. 1.3, 1.4 dhe 1.7, lidhur me nenin 31 të Kodit Penal.
Shpërndaje në
SONDAZH
Loading ...
