Myftiu i Kosovës, Naim Tërnava në mesazhin e urimit për festën e Kurban Bajramit ka thënë se festat tona fetare duhet të shfrytëzohen për të sjellë lumturi dhe gëzim në zemër të atyre që kanë nevojë, shkruan Reporteri.net.
“Sot, në ditën më të vlefshme të vitit, në këtë ditë të bekuar të Arafatit, më lejoni që në emër të Bashkësisë Islame të Republikës së Kosovës, në emër të institucioneve të saj dhe në emrin tim si Myfti i Republikës, t’ju uroj për këtë festë, e cila karakterizohet me kryerjen e haxhit dhe sakrificës së kurbanit, për t’iu afruar kështu edhe më afër mëshirës së pafund të Zotit xh.sh., njëherit, të dashur qytetarë, ju uroj edhe Ditën e Çlirimit të vendit tonë për të cilën ditë u sakrifikuan breza të shumtë që Kosova të fitojë pavarësinë e saj”
“Festat tona fetare duhet të shfrytëzohen për të sjellë gëzim dhe lumturi në zemrat e atyre që kanë nevojë duke i trajtuar të sëmurët e duke vizituar të afërmit, duke shkëmbyer urime me miq dhe duke i mbjell këto vlera në mendjet dhe zemrat e fëmijëve dhe të rinjve tanë”.
“Ju uroj për këtë festë, e cila karakterizohet me kryerjen e haxhit dhe sakrificës së Kurbanit, për t’iu afruar kështu edhe më afër mëshirës së pafund të Zotit. Njëherësh ju uroj ditën e çlirimit të vendit tonë për të cilën ditë u sakrifikuan breza të shumtë që Kosova të fitojë pavarësinë e saj”, ka deklaruar ai.
Tërnava tutje ka thënë se së bashku me miliona haxhilerë nga mbarë bota, të cilët sot gjenden në Mekën e shenjtë për ta kryer haxhin, janë edhe një numër i vëllezërve dhe motrave tona nga Kosova dhe vendeve tjera shqiptare, por edhe nga mërgata e largët, e të cilët bëjnë lutje për faljen e mëkateve dhe për begati nga Krijuesi fuqiplotë.
Tërnava është lutur për paqen në vendin tonë dhe tolerancë, por edhe rikthim të paqes në Palestinë e Ukrainë.
